RM30 juta agih dikena ngemujur pengawa nganjung vaksin ke menua pesisir

KUCHING: Perintah Sarawak ngagihka RM30 juta dikena ngemujurka pengawa nganjung vaksin Pfizer- BioNTech ngagai kandang menua pesisir di nengeri tu.

Kepala Menteri Datuk Patinggi Abang Johari Tun Openg madah, Perintah Besai minta Perintah Sarawak mantu nganjung vaksin nya ngagai menua pesisir lalu iya udah ngemendarka agih belanja nya.

“Nya alai, nadai rayat kena tinggal ba program vaksinasyen tu,” ku iya.

Iya madah munyi nya ba aum pemberita pengudah bejadika pengawa meri vaksin Covid-19 ngagai raban terabai komuniti ba Stadium Perpaduan di Petra Jaya kemari.

Ku Abang Johari, naka tu Sarawak semina nerima vaksin bansa Pfizer- BioNTech baka ke udah dikemendarka Opis Menteri Pengerai Malaysia (KKM).

Berebak enggau nya, Chairman Komiti Penyangga Penusah Nengeri (JPBN) ke mega Sapit Kepala Menteri Datuk Amar Douglas Uggah Embas madah, sebengkah komiti penyanding penemu raban Covid-19 ditumbuh betuaikaProf Datuk Dr Andrew Kiyu Dawi enggau 11 iku ari raban ke landik.

Ku tandu Abang Johari, pengawa seruran ngena sengkabung mua patut terus dititih taja vaksin Covid-19 udah diberi.

“Kemari (ensana), kitai udah mujur bejalaika pengawa meri vaksin ngagai 1,688 iku orang.

“Berengkah ari diatu nyentuk Ogos, program imunisasyen deka terus dipejalai. Aku ngarapka pengawa tu ulih nyaup juluk mutuska pengerekai Covid-19 lalu kitai ulih mulaika pengidup baka selama kelimpah terus nitihka pengidup chara baru nyentuk Covid-19 tu pukas,” ku iya.

Suara Sarawak