RM500, 000 ungkup pedagang mit

SIBU: Perintah negeri udah ngagihka urung RM500,000 dikena mantu bala pedagang mit ba Kunsil Nengeri (Dun) Nangka nengah Program Bantu Pedagang.

Kaban Kunsil Nengeri (Adun) Nangka ke mega Menteri Muda Pelajar enggau Pansik Teknologi Dr Annuar Rapa’ee madah, penyampau nya mungkur semak 200 peminta ke udah dikemendar nengah Renggat 1 enggau Renggat 2, taun tu.

“Ungkup Renggat 3 agi bisi lebih 200 peminta lalu deka diperesa enggau semua penyampau nya dipelaba lebih RM600,000.

“Peminta tu agi diperesa, kitai naka ulih ngiga belanja dikena mantu sida ngerembaika dagang mit,” ku iya rambau Pengerami Aidilfitri begulai enggau pedagang ba Taman Harmoni ditu, kemari.

Ba pengerami nya mega, Dr Annuar ke mega Menteri Muda Pengerai enggau Pengawa Berumah bejadika Kimpin Sebut Enda Ibuh Straw Plastik.

NYUKUNG KIMPIN…Dr Annuar (kanan) dikemataka Rosli benung ngurut ai irup ngena straw keretas kelai program nya.

Ngelansa silik pasal agih belanja nya, iya madah agi nya enda diberi tunai ngagai sida ke minta, tang bantu nya deka diberi nengah perengkaguna dikena bedagang.

“Nya alai, aku meransang pedagang ba Taman Harmoni ke bisi ati ngena bantu nya, tau ngaga peminta,” ku iya.

Berebak enggau nya, iya mega deka ngemanahka agi Taman Harmoni ke pemauk sida ke bedagang enggau orang ti datai.

Entara nya nambahka penyampau kipas siling enggau ngaga pintu pagar be belakang palan makai nya.

Sama datai Chairman Komiti Pedagang Taman Selera Harmoni Abdul Taib Rosli.