RM50,000 ungkup JKKK Allamanda Indah

KUCHING: Komiti Pemansang enggau Pengelikun Genturung Pendiau (JKKK) Taman Allamanda Indah nerima agih belanja penyampau RM50,000 ari Perintah Sarawak.

Sapit Kepala Menteri ti mega Menteri Betanam Betupi, Tanah Adat enggau Pemansang Kandang Menua Datuk Amar Douglas Uggah Embas madahka agih belanja dikena mantu bala komiti muntang agi merambu enggau ngatur program ba genturung pendiau sida.

“Malam tu, JKKK ngatur pengerami makai lemai dikena ngempuruka kitai berami seraya ngiga belanja. Ari nya aku nyaup bala kita penyampau RM20,000.

“Tadi Tuai Rumah Moses bisi madah sida begunaka belanja dikena ngaga rumah stor lalu aku nangkup peminta nya ngagighka RM30,000 agi,” ku iya.

Uggah bejaku munyi nya lebuh nyadi temuai dipebasa ba Pengerami Makai Lemai enggau Ngiga Belanja JKKK Taman Allamanda Indah ditu, malam tadi.