KUCHING: Penyampau RM500,000 bantu barang dapur diagih ngagai peranak ba sitak Puncak Borneo.
Kaban Parlimen (MP) Puncak Borneo Willie Mongin madahka bantu nya dikena ngelempungka penusah peranak ba sitak iya nya kelebih agi ketegal Atur Tagang Pejalai (PKP).
“Kami deka nyerahka bantu tu ngagai genap genturung pendiau ba sitak tu.
“Bantu tu deka diberi nengah Ketuai Genturung Pendiau tauka pengari genturung pendiau nya,” ku iya madah ba siti penerang berita, kemari.
Nangkan nya, bisi 8,637 rintai nama Ketuai Isi Rumah (KIR) udah ditemu sereta deka nerima bantu ari Willie ti mega nyadi Sapit Menteri Pengawa Ladang enggau Komoditi.
Kelimph ari nya, Willie meri besai terima kasih ngagai genap Opis Pelilih Mit, Ketuai Genturung Pendiau, Kapitan, Tuai Rumah, Ketuai Komuniti ba Genturung Pendiau enggau Pelilih Mit sereta piak ke bekaul ti udah bekerejasama mantu ngemuntangka pengawa sida nya.
“Kami minta ngambika genap iku peranak ba genap genturung pendiau ba sitak Puncak Borneo seruran sabar nganti bantu barang dapur nya,” ku iya.
Apin lama ke udah, genap ketuai komuniti sereta tuai rumah ba sitak Puncak Borneo udah dipinta ngumpul penerang peranak genturung pendiau diri empu ngambi ngemuntangka pengawa meri bantu ba sitak nya.
Willie madahka peranak Puncak Borneo enda tinggal nerima empas ari penusah tu berindik ari PKP sereta pengerekai igi penyakit Covid-19 ba menua tu.
