KABONG: Perintah Gempung Parti Sarawak (GPS) ngemendarka RM7 juta ungkup projek ngaga jalai nuju taba Skim Nangkir Genturung Pendiau (SPK) Hulu Kabong Renggat Kedua udah berengkah bulan Oktober tu tadi.
Pengawa nasih tanah nya udah dipenyadi Kepala Menteri Datuk Patinggi Tan Sri Abang Johari Tun Openg, ensana.
Projek jalai sepanjai 810 meter R3 standard (belakin enggau parit) nya beguna amat ungkup peranak ti deka diau ba SPK Hulu Kabong Renggat Keterubah ti udah tembu.
Projek nya disadang berengkah dipejalai Disember tu lalu disadang tembu Julai 2023.
Bekaul SPK Hulu Kabong Renggat Keterubah ti baru tembu 19 November tu tadi mujur pengawa nyendiaka 205 lot ba atas tanah pemesai 61 ikar beungkus RM30 juta.
200 lot nya ungkup rumah peranak lalu 50 ari nya deka dikemansang Kaunsil Pemansang Pengawa Berumah di baruh Program Rumah Spektra Permata nyadi proje rayat.
Tu dikena nangkup peminta peranak ti manah tanah enggau mutarka penanggul rumah digaga ngachir.
Lot ke bukai nya ungkup perengka guna baka stesyen mit Sesco, industri kotej, surau, tadika enggau palan bukai.
Ungkup rikod ba Pelilih Kabong (enda nyengkaum SPK Hulu Kabong Renggat Keterubah) bisi tujuh SPK mungkur 882 lotke alai 433 lot udah disedia.
