JULAU: Arus pemansang sitak Julau deras agi dipejalai nengah agih belanja RM74 juta ti udah dikemendarka Perintah Sarawak.
Premier Sarawak, Datuk Patinggi Tan Sri Abang Johari Tun Openg madah, agih belanja nya dikena ngerumban projek bekal ai beresi dia.
Ku iya, Perintah Sarawak sedarka rayat Julau udah lama nganti projek nya ari Perintah Besai.
“Taja pia, kitai enda ulih nganti agi enggau bepanggai ba Opis Menteri Pemansang Menua Pesisir (KPLB) bejalaika projek tu.
“Perintah Sarawak empu deka bejalaika projek bekal ai beresi beungkus RM74 juta lalu aku berani ngemendar laban kitai bisi belanja.
“Kitai enda ulih bepanggai ba KPLB lalu aku nemu projek tu udah lama, rayat pen udah nganti lama,” ku iya ba Program Tuai Begulai Enggau Rayat Julau ditu pagi tadi.
Abang Johari madah, pemansang ba Pasar Julau deka chakah agi dipejalai enggau ngemendarka projek ngaga balai beungkus RM15 juta kelimpah projek Tebing Ai Julau.
Nambahka nya ku iya, projek ngaga stesyen minyak mega beguna amat ngagai peranak sitak nya.
“Kitai sama nemu, penatai pemisi orang Julau, Pakan enggau Meluan ukai semina ari asil lada aja, tang mega ekonomi menua majak suman.
“Nya kebuah kitai deka numbuhka stesyen minyak ditu ti deka dipejalai nengah SEDC Energy,” terang iya ti mega Chairman Gempung Parti Sarawak (GPS).
