KUCHING: Perintah Sarawak ngagihka belanja RM85.275 juta nengah Bajet Sarawak 2021 dikena bejalaika program bekal ai kelebih agi ba menua pesisir.
Kepala Menteri Datuk Patinggi Abang Johari Tun Openg madahka Perintah Sarawak naka ulih nyikap bekal ai beresi ngagai kandang menua pesisir.
“Inisiatif nyikap bekal ai tu ulih mantu ngerumban pejalai projek ba kandang menua tu.
“Tu nyengkaum bejalaika projek paip ungkup Darul Hana, ngemanah tangki ai Berawan, bekal ai Long Lama (Renggat Tiga) enggau ke bukai,” terang iya.
Abang Johari mansutka jaku nya lebuh bejuraika Bajet Sarawak 2021 ba Aum Dun, ditu tadi.
Berebak enggau nya ku Abang Johari, perintah mega deka ngagihka RM1.710 bilion nengah Program Grid Bekal Ai ungkup kandang menua ti napi penanggul suntuk ai.
“Program tu deka disedia nengah Inisiatif Bayar Alternatif Negeri ba taun 2021,” ku iya.
