ARTIKEL

ALUS… Asil kain Buri digaga Robbia

Robbia pintar ngena peluang nyual produk buri

Facebook
Twitter
LinkedIn
WhatsApp
Telegram

KUCHING: Taja nadai awak kelimpah bisi pengawa entap, Robbia Jarup, 52, tang iya pintar laban enda masau peluang ngaga sereta bejual kain Buri.

Ngena minat ti dalam ngagai pengawa ngaga kereban pesaka asal, asil pengelandik jari Robbia nerima mayuh peminta ari orang luar.

Pemungkal Ruby Collection nya madahka, kelimpah landik ngaga kain Buri, iya mega landik ngaga selampai, Baju Burung Sulam, nganyam bakul enggau ngaga sugu tinggi.

“Aku ngaga ari ‘skirt’ Buri, gaun Buri, ‘vest’ Buri enggau selampai Buri.

“Semua nya digaga aku empu, berengkah ari nyukat, nguntin kain, ngelekatka kulit tekuyung Buri, nyait enggau nyentukka tembu,” ku iya lebuh dirandau Suara Sarawak, tadi.

Peranak Iban asal Serian tu madah, iya berengkah belajar ngaga kain Buri rambau taun 2023.

“Aku tama Kelas Buri enggau Sugu Tinggi ti diatur Pengajar Louis Wesley ba Serian suba.

“Tang pengelandik nganyam enggau nyulam sigi endang udah ditemu aku ngelama tu laban ari mit aku sigi rindu ke pengawa baka nya.

“Kebendar aku tama kelas Buri laban semina deka ngaga ungkup diri empu aja laban aku sigi minat ke utai baka tu, tang bisi siku dua bala bakih ngasuh aku ngaga ke sida,” ku iya.

Ari nya, Robbia meda bisi peluang endur iya ngelakuka mayuh produk Buri ngagai orang luar.

“Aku meda peminta nya bisi, sida ngasuh aku ngaga ‘skirt’ panjai, ‘skirt’ pandak, gaun, selampai enggau ‘vest’ ti dilekat kulit tekuyung Buri.

“Ari nya meh aku lalu belabuh ngaga semua produk Buri awakka ulih dijual ngagai mensia mayuh,” ku iya.

Ngembuan Degree Pelajar Sekula Primari, indai ngagai lima iku anak tu madahka pengelabih teknologi baru meri iya peluang ngerembaika produk Buri di media rama baka Facebook.

“Aku suah ngambar enggau engkah kain Buri ti udah tembu digaga ba Facebook, ari nya orang meda asil pengelandik jari aku.

“Bisi sekeda sida ngiga aku laban meda gambar ti dikunsi ba media rama.

“Nya alai, dalam sebulan urung empat tauka lima bengkah produk Buri ulih dijual aku kelebih agi ‘skirt’,” ku iya.

Lebuh ngelansa sentang pemar ngaga Buri, Robbia madahka awak nyadi pemar pemadu besai ngagai iya.

“Lebuh peminta Buri mayuh, aku chukup kisuk laban aku siku pengajar.

“Pia mega, lebuh bekal kulit tekuyung Buri tulin abis ba pasar, sigi nyau dua ke tiga minggu nganti baru datai.

“Nya alai, sigi bendar aku magi awak ngambika peminta enda putus lalu pengawa tetap ulih diadu enggau meruan baka ngambi awak lepa enggau malam hari aja aku ngaga kain Buri,” ku iya.

Iya mega madah, selalu sedia meli bekal kulit tekuyung Buri tulin mayuh awakka enda suntuk nyema bakal nya ambis di pasar.

Ku iya, peminta ti enda putus ari orang luar nyadi peransang ngagai iya seruran nanka pengawa ngaga kain Buri.

“Aku berasai ransing ati meda mensia mayuh enda badu ngudar kain Buri ari aku.

“Nya nyadi peransang sereta motivasyen ngagai aku neruska pengawa tu.

“Gaga amai ati laban asil pengelandik jari ngaga kain Buri aku dibeli sida ba Limbang, Miri, Bintulu, Kuching, Sri Aman enggau Lubok Antu,” ku iya.

Iya madah, pengawa ngaga Buri mega ulih nyadi penatai pemisi kedua ngagai sida sebilik.

“Aku nerima sukung penuh ari ruang bilik, bala bakih enggau kaban belayan dalam pengawa ngaga kain Buri tu.

“Nya alai, aku ngarapka asil pengelandik jari aku ulih ngerembai sereta datai ngagai tikas ti tinggi agi lalu ulih dikelala orang menua luar,” ku iya.

HALUS… Asil kain Buri digaga Robbia

BERITA LAIN

Rampa menua meruan beresi

Aum Parti-Parti (COP) Konvensyen Langkar Pengawa Ubah Klimet Gerempung Bansa Beserakup (UNFCC) ngempuru bemacham raban pemegai taruh antarabansa ari dunya dagang, perintah enggau komuniti sivil.

BERITA TERBARU

Lelaki ditemui mati di Kampung Tunku

KUCHING: Seorang lelaki ditemui mati di Kampung Tunku, Jalan Astana, di sini hari ini. Ketua Polis Daerah Kuching ACP Ahsmon Bajah berkata, polis menerima laporan

Percepat naik taraf klinik kesihatan, sekolah daif

KUCHING: Perbincangan antara Kerajaan Sarawak dengan Putrajaya berkaitan isu pendidikan dan kesihatan di Sarawak belum lagi selesai dan muktamad, namun beberapa perkara sudah diselesaikan. Premier