KUCHING: “Aku seruran besedia meri servis baikka nyadi chalun tauka enda,” ku penyandang Dun Tarat Datuk Roland Sagah Wee Inn.

Iya ti mega Menteri Muda Betanam Betupi, Tanah Adat enggau Pemansang Kandang Menua madahka naka diatu penentu ti deka ngaga pemutus iya agi bediri ba Dun Tarat bepanggai ba Kepala Menteri Datuk Patinggi Tan Sri Abang Johari Tun Openg.

“Aku enda nemu, tanya Kepala Menteri dulu.

“Aku empu endang udah seruran besedia meri servis enda ngira nyadi chalun tauka enda,” ku iya.

Roland bejaku munyi nya lebuh ditanya media pengudah Nyuaka Chek Bantu ngagai Sekula Mission Anglikan Bagi Menua Kuching di sebuah hotel ditu, kilah ensana.

Ku iya, taja pan engka bisi chalun bukai bediri ba sitak nya ila, iya endang tetap seruran meri servis ngagai rayat.

Rambau ditanya engka iya bisi peluang deka dichalunka baru bediri ba Dun Tarat, Roland sekali agi nyaut enda nemu lalu nyerahka pemutus nya ngagai Kepala Menteri.

Dulu ari nya, kena 12 Januari taun tu, Roland madahka iya besedia ngetanka penuduk di Dun Tarat dalam Pengawa Bepilih Besai Nengeri (PRN-12) ti deka datai, tang iya madahka pekara nya mengkang bepanggai ngagai pemutus Presiden Parti Pesaka Bumiputera Bersatu (PPB) Abang Johari.

Ungkup penerang, Roland udah nyadi pengari rayat di Dun Tarat sepengelama lima penggal kenyau menang kerusi nya ba taun 1996.