Royalti hak pemain industri kreatif

Serak tu Ruai Pemerindang deka bekunsika randau enggau dua iku penengkebang lagu ke chukup tebilang ari baruh perabung serikat Kaban Music Production (KMP) iya nya Jesley Jabu Bajang enggau Pengajar Matthius Mambang Bajang bekaul enggau pekara baru ba dunya pemerindang Iban.

RUAI : Nama berita bakih? Nyadi ngarika Ruai Pemerindang, Suara Sarawak aku meri terima kasih ngagai seduai laban ulih limpang baka ke ngalihari tu, endur bekunsika berita pemadu baru bekaul enggau lagu-lagu kitai Iban ke dikesema aku baka ‘kulat tumbuh pengudah ujan’ reti nya chukup mayuh. Nama pengandal nuan ngagai raban artis baru tu bakih?

JESLEY : Terima kasih bakih, kebendar siti pekara ti chukup manah ungkup pengerembai industri lagu Iban laban nya mandangka Musik Lagu Iban tetap dikerindu lebih agi rebak baru taja begembar enggau penatai lagu ari bansa enggau menua bukai baka Indonesia,Korea enggau ke bukai. Diatu kitai sama nemu bansa bukai mega bisi ngerikod lagu Iban.

Besai pengandal aku ngagai sida, ngarapka tau bulih pemujur lalu ukai semina ayan setengan jalai aja tang ngarapka terus nyingkang jauh dalam industri tu.

Pekara tu ke baka tu mesti diperati kitai ari bemacham sukut. Kesatu, nyangka sida iya nadai produser ka ulih nanggung belanja dikena ngaga album.

JESLEY JABU BAJANG

Kedua, nyangka jampat asa pengudah album keterubah enda laku tauka enda datai ba juluk ti dikearap.

Ketiga iya nya nyangka laban nadai pengepuh napi bemacham penguji sekumbang digela penanyi.

RUAI : Manah amat saut nya bakih. Kitai sama nemu seduai tentu kala ngasaika pekara ke sebaka. Nyadi nama chara seduai napi pemar ke baka tu?

JESLEY : Baka tu iya bakih, pemar nya ulih ditapi enti kitai ngembuan pengeransing ati ke chukup tinggi ambika chunto ati mesti liat, anang enda puh, gawa bebendar, anang mudah alah ketegal jaku negatif, enda tau mudah besak sereta patut bebasaka semua orang ti udah meri sukung.

Kebuah pia laban tuju kitai terejun ke industri tu endang bedagangka ‘pengelandik’ diri kelimpah seruran nyaga ulah ti manah ba dedini alai laban peminat endang semampai merati lebih agi ba media rama.

RUAI : Sigi betul penemu nya bakih Jesley. Nyadi limpang dulu ngagai nuan pengajar Mathhius. Diatu ukai semina penanyi mayuh, serikat rikoding pan mayuh. Nya alai bisi kala kini bala pemain industri pemerindang Iban tu nerima bayar royalti ari asil karya sida?

MATTHIUS : Terus terang, aku enda tentu ulih nyaut enggau nyemetak bekaul enggau isu tu laban ba penemu aku, orang ti pemadu engkeman tauka semitan nemu agi pasal pekara tu endang bala penanyi empu.

Tang naka ke ditemu aku, nadai ga kala ninga berita bala penanyi nerima royalti ke nyengenda ari raban bekaul.

Enda nemu mih enti utai nya bisi, endang utai disampika semua. Tang bepelasar ke peneleba tudah diri ngelama tu enti kompeni rikoding nya bisi berejista ba gerempung baka Penyaga Hak Penulis Malaysia (MACP), Pemerindang Orang Periman Malaysia (PPM) enggau Rikod Pemerindang Malaysia Berhad (RPM) royalti endang tetap bisi nerima royalti nitihka penyampau album ke laku dijual.

Pia mega pasal royalti tu asal aja penanyi nya udah bisi ngerejista diri nyadi kaban MACP, PPM enggau RPM pampas royalti endang bisi taja nyangka enda besai laban nitihka bungkur industri pemerindang Iban ti enda besai.

Ngelansa pasal royalti, nya endang udah hak lalu patut diberi ngagai sida ti patut baka penyanyi, komposer, penusun muzik enggau penulis leka lagu laban sida tu mih ke nyadi tulang sukung pemujur sesebuah lagu tauka album.

Pia mega ba pekara tu, produser sigi patut bisi terima laban sida ti mayuh ngemansutka puku dikena ngemujurka album.

MATTHIUS MAMBANG BAJANG

RUAI : Ya…nya mih pekara ti deka dipeda semua kitai. Udah tu deka nemu bekaul enggau makit album lagu Iban tusah rembus ke menua luar. Nama kini penemu nuan sentang tu?

JESLEY : Lagu kitai Iban enda baka lagu bansa bukai makit sigi enda besai kenyau ari kelia.

Tu kebendar laban nadai peminta ari menua luar, taja pia ba segang dunya teknologi ke maya hari tu. Aku berati pekara tu jauh berubah laban pemisi media rama baka Facebok enggau Youtube. Nyadi bungkur orang ke meda lebih mayuh.

Kelimpah ari rayat menua tu empu, lagu kitai mega ulih dipeda bansa Iban ke nguan menua Kalimantan di Indonesia laban bisi pelasar Youtube.

RUAI : Tanya kepenudi sebedau nutup randau ngagai nuan Pengajar Matthius. Nama kebuah artis Iban jarang dikangau nyadi Pematak Randau ba dedini Stesyen TV tauka nyadi Duta sesebengkah produk dibanding enggau artis bansa bukai di Semenanjung?

MATTHIUS : Au…Sebedau nyaut dulu aku meri besai terima kasih ngagai Ruai Suara Sarawak laban udah meri awak ti chukup besai reti ngagai kami duai baka sehari tu lalu bekunsi ke naka iya penemu dikemisi diri ditu.

Pulai ngagai tanya tadi,ba aku…raban artis kitai Iban sigi bisi potensi nyadi Pematak Randau ba sesebengkah program enda ngira ba program televisyen tauka stesyen radio ba menua tu taja ukai semua.

“Tebal agi artis kemaya hari tu mayuh nya tinggi pelajar bisi nya ngembuan Degree, Diploma enggau ke bukai.

“Tang nya mih, nyangka bedau maya enggau apin bisi peluang dibuka endur bala artis Iban diambi nyadi ti pematak randau enggau pengari ngelakuka sesebengkah produk.

RUAI : Terima kasih bakih Jesley enggau Pengajar Matthius ke awak ke udah diberi seduai ungkup randau ngerampas tu. Arapka industri lagu kitai Iban terus ngerembai sereta angkat seriris enggau industri muzik lagu bukai.

Suara Sarawak