PENANYI tebilang, Rudy Peter ngembuan juluk besai deka numbuhka studio pengeluar lagu kediri empu dudi hari.

Iya ti tebilang nengah lagu Kelalu Dalam nya madahka diri naka ulih ngamat juluk besai nya dikena ngerichahka agi industri muzik Iban kemaya hari tu.

“Enti ukai kitai bansa, sapa agi orang ti deka dikeandalka kitai nyagu enggau ngangkatka industri muzik Iban ngagai tikas ti tinggi agi sebaka enggau industri muzik menua bukai?

“Tu siti juluk besai aku dikena nempa mayuh agi penanyi baru dikena ngerichahka agi industri muzik kitai kelimpah ngasilka lagu ti bekualiti,” terang iya.

Kualiti lagu nya mungkur semua sukut nyengkaum rentak, tiun, video, leka lagu enggau ti bukai kelimpah majak diterima sereta diaku semua orang.

BEGEMPUNG NYAPAI SITI TUJU
Pemansang teknologi kemaya hari beguna amat dikena ngasilka lagu bekualiti lalu teknologi digital mai empas besai ba pengawa ngelaku enggau ngerembai rentayan industri muzik Iban.

“Lebuh semua orang begempung nuju juluk sebaka, aku pechaya kitai deka nempa mayuh agi penanyi baru bepenau enggau ngasilka lagu bekualiti.

“Pekara tu beguna amat dikena negap enggau ngemansangka industri muzik Iban.

“Kitai endang ngaku bisi sekeda penanyi Iban bepenau mujur ditanya sereta nanggam kerejasama enggau serikat pengeluar lagu ari Semenanjung Malaysia.

“Empai lama, bisi produser ari Semenanjung Malaysia ngeluarka lagu ngena jaku Iban lalu nya siti basa dikena ngaku industri muzik kitai majak dikerindu enggau diterima bansa bukai,” ku iya.

Rudy madah, nya siti pengepun ti manah ti deka nentu tunga kuing industri muzik kitai nyapai penyulut besai.

IBUN MANAH PENGERINDU TUCHI
Anak pengkuan ari tiga diri menyadi nya mujur ngeluarka lagu pemadu baru diri ti pejuluk Bedega Beserak Lalang.

Lagu ti dikeluarka nengah pelasar YouTube Rudy Peter Official kena 21 Julai tu tadi mujur dipeda lebih 74,000 orang enggau nerima kelai like lebih 1,200 ari mensia mayuh.

Lebuh dirandau senentang lagu nya, Rudy madah, lagu nya ngenang tujah pemar pengidup orang ti benung besulu tauka baru jadi melaki bini ti jauh ari pangan diri ketegal pengawa.

Iya madah, semina orang ti kala ngasaika peneleba nya nemu pemedis, pengirau enggau pengelengau jauh ari orang dikesayau.

“Tu siti pengasai ti chukup enda nyamai. Tang tu beguna amat dikena nguji penetap, penaluk enggau pemeruan penyayau ngagai pangan diri.

“Kitai bela nemu, bemacham penguji datai deka ngeruga ati nyelepak pengelemi lebuh kitai idup kediri jauh ari orang dikesayau.

“Berekat pengasih Tuhan ti meri pengering ba ati enggau runding ngasuh kitai seruran bepegai tegap ba semaya danji deka idup sekunsi mujur meri pengering dikena ngelaban semua penguji nya,” terang iya.

Lalau Rudy, sida ti jauh pangan diri kelebih agi melaki bini, anang sesekali alah diumbuk penguji enggai ke pengerindu tuchi dalam ati bebali nyadi batu pemenchi ngerusak rumah tangga dudi hari.

Taja baka ni pen penguji ngusak tangkai ati, ku iya, kering ke ati ngambi tetap angkunka pangan diri lalu anang tepawah singkang enggai ke nesal dudi nadai reti.

TEMEGAH JULUK NYADI NYATA
Ngelansa senentang pejalai iya ba dunya pemerindang, Penulung Direktor Opis Pelajar Nengeri Sarawak (JPNS) nya madah, iya berengkah ngaul pengawa nya ba taun 2020 rambau menua dituntung pandemik COVID-19.

Kena 20 November 2020, iya mujur ngeluarka lagu single keterubah ba baruh perabung Kaban Music Production (KMP) ti pejuluk Kelalu Dalam.

Lagu nya mujur ngukir nama Rudy Peter ba dunya pemerindang Iban lalu dikelala mensia mayuh nyentuk diatu.

Minat iya ba pengawa belagu nya endang dikembuan iya ari mit nyentuk diatu.

Nya kebuah iya ransing masuk bemacham pekit belagu kenyau ari sekula primari sekali ke nya diatur raban sekula tauka orang luar.

“Genap kali ninga lagu baru diputar bala DJ ba churung radio, sigi berumban meh aku ngambi pen enggau keretas nulis leka lagu nya,” tusui iya seraya mulaika kenang diri agi biak suba.

Rudy madahka diri udah lama nyimpan juluk deka ngerikod enggau ngeluarka lagu tang suba meseti ngaga siti album tauka album kompilasyen enti deka nyadi penanyi.

“Pekara tu udah tentu begunaka awak, pengiruh enggau belanja ti besai enti deka ngeluarka siti album.

“Berebak ari pemansang teknologi kemaya hari tu, sapa-sapa aja ulih ngerikod enggau ngeluarka lagu single diri.

“Nya kebuah industri muzik Iban majak richah dipasuk mayuh penanyi baru bepenau lalu diatu baru aku tebuka ati deka ngerikod enggau ngeluarka lagu diri empu.

“Taja pen agi baru ba dunya pemerindang tu, aku chukup beterima kasih ngagai Tuhan laban mujur ngeluarka empat buah lagu diri.

“Nya nyengkaum lagu Kelalu Dalam, Nyema Ulih Ditikal Baru, Penyangga Nyawa enggau pemadu baru iya nya Bedega Beserak Lalang,” ku iya.

Terang iya, Tuhan udah meri iya penau belagu, nya alai, iya ransing ngeluarka lagu diri ngambi bisi dikenang dudi hari lalu ukai ketegal bisi niat deka tebilang laban udah laun berengkah.

Taja pia, Rudy andal penatai iya ba dunya pemerindang Iban tu ulih meri empas ngagai industri muzik Iban, dikelala enggau diterima manah semua orang kelebih agi bansa Iban empu.

ANDAU PENGUJI
Penanyi beumur 44 taun nya madah, sekumbang mekuh enggau bejalai ba dunya pemerindang, bemacham penguji kala diasaika iya.

Pengiruh gawa nyadi penguji besai ditapi iya nyentuk nadai tentu bisi awak dikena merindang peminat enggau ngerikod lagu.

“Kekadang sinu asai ati enda ulih merindang peminat diri lebuh bisi dikangau merindang ba bemacham program tauka aktiviti ketegal pengiruh gawa.

“Nya alai, aku meseti pintar magi awak diri ngambi ulih bejalaika pangku pengawa diri enggau merindang bala peminat.

“Nya pen semina ulih merindang ba palan ti semak aja tang enti ba palan ti jauh, pekara tu meseti diperambu tumu ngambi enda besibil enggau pangku pengawa diri,” tusui Rudy.

Kelimpah ari nya, ku iya, laban ti nyadi penanyi kediri (independent artist), pengawa ngerikod enggau ngeluarka lagu sigi ngena belanja diri empu magang.

Bala penanyi ti ba baruh perabung kompeni pengerikod enggau pengeluar lagu sigi dipelanja kompeni nya empu.

Rudy madah, iya beterima kasih laban bisi bala bakih bela nyukung iya nengah pengawa melanja lagu, tusun atur lagu enggau video lagu.

BESAUP NGELAKUKA INDUSTRI MUZIK IBAN
Rudy ti rindu ke pengawa nginti nya madah, industri muzik Iban kemaya hari tu chukup maju sereta mujur nempa mayuh penanyi bepenau.

Tang sayau, ku iya, nadai mayuh orang kediri tauka kompeni melanja ngelakuka bala artis Iban kelebih agi ba sukut broadcast baka televisyen.

“Naka diatu, semina Televisyen Sarawak (TVS) aja ti ditemu aku nyendia program ungkup bala artis Iban ti lama enggau baru ba program televisyen sida.

“Aku andal dudi hari ila, mayuh agi kompeni broadcast baka televisyen mantu ngelaku enggau nyendia program ungkup artis Iban ngambi industri muzik kitai dikelala menua luar.

“Pia mega, Anugerah Juara Lagu Iban meseti diatur ninting taun dikena ngaku bala penanyi enggau penengkebang lagu ngambi sida ransing agi besemekih ngasilka lagu bekualiti sereta ngangkat industri muzik Iban ngagai tikas ti tinggi agi,” ku Rudy.

Ngena peluang berega tu, Rudy beterima kasih ngagai bala peminat, sida sebilik, bini dikesayau, bala bakih enggau kaban belayan ti enda leju nyukung iya.

Iya mega minta ampun laban enda ulih suah merindang sereta ngarap bala peminat meretika pengiruh iya bejalaika pangku pengawa diri.

Dikena ngujung ke randau diri, Rudy ngelalau mensia mayuh ngambi seruran nyukung industri muzik Iban.

“Anang leju nyukung ngambi industri muzik Iban majak dikelala enggau manggai ba tikas ti tinggi agi. Enti ukai kitai, sapa agi deka nyukung lagu bansa diri?” ku iya nyemetak.