KUCHING: Siku penyual mi di Sibu lenyau duit simpan penyampau RM231,792 pengudah ditipu tiga manang bula.

Kepala Polis Sarawak, Datuk Mohd Azman Ahmad Sapri madah, sida nerima ripot ari siku indu beumur 65 taun nya kena 27 June tu tadi pengudah sedar diri ditipu kena 24 June tu tadi.

Ku indu nya, kena 23 June tu tadi lebuh di Pasar Sentral Sibu, bisi tiga iku indu ti enda dikelala lalu siku ari sida nya dipelaba peranak China enggau dua iku agi peranak menua tu ngelawa iya.

Ngelansa silik, iya madah, saspek madahka diri nemu nenung nasip lalu madah ngagai indu nya deka sial sereta bebadi nyawa. Mohd Azman madah, udah nya indu nya dibai saspek bejalai ngagai Jalai Hardin Sri Menanti, Sibu lalu saspek madah ngagai iya meseti mansutka duit dikena sembiang muai sial.

“Ketegal irau ke pekara nya nyadi, indu nya udah ngeluarka duit simpan penyampau RM231,792 nengah tiga transaksyen ari dua akaun bank iya ba dua buah institusyen wang ba mengeri Sibu,” ku iya.

Mohd Azman mansutka jaku ba aum pemberita di Indu Opis Polis Kontinjen (IPK) Sarawak, ditu kemari.

Ku iya, pengudah mansutka duit, indu nya diasuh saspek masuk ke semua duit nya dalam siti kantung biru.

Ku iya, indu nya diasuh sembiang enggau nyuaka kantung ngagai siku ari saspek.

“Pengudah tembu besembiang, indu nya diasuh pulai ke rumah mai kantung nya lalu saspek madah semina ulih muka kantung tu pengudah sebulan,” terang iya.

Mohd Azman madah, indu nya semina sedarka ditipu pengudah muka kantung nya kena 24 June lalu tetemuka semua duit iya nadai dalam nya enggau berumban ngaga ripot polis ungkup pansik silik