Rumah Asap M10 dibuka baru lepas PKPB

KUCHING: Operasyen Rumah Asap M10 ditu deka dibuka baru nganti timpuh Atur Mindah Betagang Belebas (PKPB) udah abis, ku tauke palan dagang Jennarino Jeraki.
Ku iya, atur tu dipejalai laban nangika pengerekai penyakit Covid-19 ke majak niki ba mayuh endur di nengeri tu jam ke diatu.
“Berebak enggau nya, ginitir raban penanyi ke dikanggau merindang ba palan tu mega diketu dulu nganti PKPB tu udah abis.
“Kebendar ngelama tu endang bisi nganggauka sekeda penanyi merindang mensia mayuh ke ngulu palan tu.
“Tu dikena mantu raban artis kitai Dayak nambahka penatai pemisi sekumbang ti enda ulih merindang ngagai palan bukai ketegal pengerekai Covid-19.
“Kepenudi, kami bisi nganggauka sekeda raban band kelimpah bala penanyi baka Rozana JD enggau Lady J merindang bala peminat ditu.
“Sebedau tu mayuh mega penanyi bukai udah merindang ditu iya nya Lakuang Ading,Suzi K,Erni Diana Lat,Jenny Tan,Feng Group Band,Wat Andom,Dino,Rozana JB & Lady J,Betty,Timothy,Eyqa Saiful,Kyle Roxy & Bon Jovi,Jesley Jabu & Geng,Swenson Libu enggau Dany,”ku iya nerang ngagai Suara Sarawak.
Jennarino mega madah Rumah Asap M10 bisi ngenahka bemacham pemakai ungkup bala temuai baka jani panggang, manuk panggang, umai, mee, ikan panggang enggau ke bukai.
Berebak enggau nya, iya mesan mensia mayuh terus ngasika Atur Pengawa Standard (SOP) ke udah ditetapka raban bekuasa ngambika penyakit Covid-19 di menua tu jampat pukas.

JENNARINO JERAKI

Suara Sarawak