KANOWIT: Penyikar siku peranak Rumah Besi, Jalai Kanowit ditu mujur nyelamatka rumah panjai sida ari penusah karam di darat malam tadi.

Ketuai Operasyen Bomba enggau Penyah Penusah (BBP) Kanowit, PBK II Raja Imran Shah madah, sida nerima kangau ngenyit urung pukul 8.10 malam sebedau nganjung seraban bomba ngesah kin.

Ku Imran, lebuh datai dia, sida meda api ba sepintu bilik ari rumah panjai udah dipadam ngena siti perengka pengerara api ti nyikap rumah panjai nya.

“Penyikar lelaki nya udah nyelamatka nyawa enggau reta tengkira sida serumah pemanjai 22 pintu bilik ari angus lengis demalam.

“Pansik tumu tetemuka penusah dipelaba bepun ari penanggul sut tali karan ba bilik lumur lima.

“Piak SESCO enggau polis mega bisi ngesah ngagai endur penusah nyadi malam tadi,” terang iya.