Rumah Joseph miring ngampun

SIBU: Baka rumah panjai bukai, peranak Rumah Joseph Jarrau di Tanjung Bekakap, Batang Lebaan ditu ngatur pengawa miring dikena nyaga diri ari penusah ke balat nyadi diatu, COVID-19.

Pengawa miring ngampun nya diatur sida serumah ke bisi 23 pintu bilik, apin lama ke udah.

“Atur piring tu dikena kami miring ngampun laban kami serumah nangika pengelikun diri ketegal menua diatu betapi enggau COVID-19.

“Piring tu minta petara nyaga rumah panjai kami ari ditiki penyakit baka tu,” pia ku iya madah sepengudah miring lemai nya.

Tuai Rumah Joseph madah, menua tauka rumah panjai bukai udah ngaga piring ampun ti ngelai semua menua diatu benung nangi sereta irauka pengelikun enggau pengerai diri.

MINTA IBUN PETARA… Peranak Rumah Joseph Jarrau miring lemai kilah ensana.

“Nya alai, piring tu ditusun kami baka bala bukai minta ibun petara ari penyakit COVID-19,” ku iya madah baru.

Berebak maya pengawa nya, iya ngelalau sida serumah bela bejaga ke pengerai enggau pengelikun diri maya diatu.

“Ukai semina nya, aku andal sereta minta amat kami serumah anang ningkah Atur Pejalai Betagang (PKP) ti benung diteritka perintah maya tu,” pia ku iya sambil madahka diri seruran besampika sida serumah semampai gerai.

Kelimpah ari nya, jalai penama ngelawa rumah panjai tu mega dipadahka diempang sida ngambika orang luar enda sepeneka tama.

Nyentuk diatu udah mayuh rumah panjai nyengkaum di Kanowit, Kapit sereta ke bukai bela ngibun diri lalu ngaga piring ampun ketegal ngira pengelikun diri ari COVID-19.

Bisi mega rumah panjai ngempang penama ngagai rumah sida nangika orang menua bukai tama sereta ngeletak ukum mata duit nyema tangkan nya enda dikemana.

PIRING AMPUN… Piring diengkah ba mua penama ngelawa rumah panjai. 

Suara Sarawak