Rumah Layang diatu datai jalai

SARATOK: Rumah Layang, Nanga Ibus di Rodan diatu matak seput lantang pengudah sida nerima pemansang ke dianti ngelama tu.

Ku Tuai Rumah Layang Ketit, kandang menua Mudong ampit ngasaika buah pemansang pengudah jalai alun digaga ari Simpang Mudong lalu mansa rumah panjai sida.

Jalai nya mega udah tembu nitihka timpuh perambu enam bulan sereta ulih ditengah entukar mit.

“Rumah panjai kami ke dibatak Lanyau Gawing lalu dientak dalam taun 1960 ke manggai 59 taun lalu agi teguh bediri datai sehari tu.

“Kami serumah bisi 27 pintu bilik ke diuan 271 iku, urung 30 kilometer ari Pasar Roban endang randakka pemansang kenyau ari 56 taun menua Malaysia ditumbuh,” ku iya lebuh dirandau Suara Sarawak.

NGEMPUNG RAYAT….Tuai Rumah Layang Ketit.

Sida serumah ngelama tu napi pemar ketegal nadai disikap jalai penyambung darat ti meruan tang semina ngandalka jalai ai ngena injin pam maya undur ke Pasar Roban urung dua jam pejalai bepanggai ba gaya ai.

Nya alai Tuai Rumah Layang madahka diri berasai gaga amat dataika labuh ai mata nerima pemansang dipejalaika perintah nya.

“Ngelama tu sinu meda kami serumah chukup merinsa enti deka undur ke pasar. Maya ai langkang sereta padu, mayuh jam tebasau, ni ke bebatak nengah rantau kerangan enggau besuar.

“Enti maya ai bisi kembai, bisi ujan muakka ulu nangi mega ke ai bebuli lalu tau ngasuh penusah bukai nyadi.

“Enda ulih disema enggau leka jaku pengaga ati kami ditu diatu laban lebih 56 taun udah ngasai pemedis enggau pemerinsa ngena perau nurun begiga tauka undur ke pasar sereta mudik maya mulaika diri ari Pasar Roban,” ku iya ngelansa.

NERIMA PEMANSANG… Peranak Rumah Layang, Nanga Ibus di Roban lantang ati bisi jalai penyambung nengah darat.

Ku iya, sukung nadai bebagi sida semenua ngagai pengari rayat ngelama tu mega udah dibalas ngena pengelantang.

“Sebedau tu kami serumah napi pemerinsa enda ulih bebai kereban rumah baka jemari, bangku enggau utai kena beridup ke bukai laban ke merau nengah ai Seblak pengelama dua jam nitihka gaya ai.

“Tang diau kami ulih ngelimat belanja enggau jam mindah, semina 30 minit aja ari rumah ngelawa Pasar Roban.

“Penembu jalai tu mega mutar mayuh penanggul bukai ke nating. Besai amat pengandal kami jalai tu deka matak mayuh agi pemansang bukai sereta ngerumban semua projek deka dipejalai udah tu,” ku iya madah nyemetak.

Nambah nya, Kaban Parlimen Saratok Ali Biju lebuh dirandau madahka endang udah pangku pengawa ke patut dikereja genap pengari rayat enda milih sapa enggau parti diarika iya.

“Rayat udah milih kitai nyadi pengari sida, nya alai patut dibalas kitai enggau pemansang.

“Perintah Besai endang seruran ngemeratka penyuntuk ditapi rayat menua pesisir

“Jalai Mudong nuju Ibus tu siti ari chunto Perintah Besai Pakatan Harapan (PH) beratka pengelantang rayat,” ku Ali ti mega Kaban ADUN Krian.

Jalai nuju Rumah Layang Nangga Ibus tu sepanjai 7 kilometer digaga ari Jalai Mudong tu mega mai pemaik ngagai Rumah Bukul Sungai Pitoh Ibus Roban.

 

JALAI PENYAMBUNG… Gaya jalai ngelawa Rumah Layang ari Simpang Mudong.