Rumah Merikan ngentak rumah panjai baru

SRI AMAN: Peranak rumah panjai ba Bukit Begunan patut meri sukung tegut ngagai Perintah Sarawak nentuka pemansang seruran dipejalai ba menua sida.

Adun Bukit Begunan, Datuk Mong Dagang madah, sukung tegut beguna amat nentuka pemansang dilanggur ulih dipejalai enggau lanchar sereta mujur.

Ku iya, agih belanja Program Transformasyen Menua Pesisir (RTP) penyampau RM100,000 udah diberi ngagai Rumah Merikan nyata ngayanka penyiru Perintah Sarawak nentuka nasip rayat diintu meruan.

“Tu entara projek pemansang dikemendarka Perintah Sarawak dikena mantu rayat ari sukut belanja ngentak rumah panjai baru.

“Nya alai sukung rayat kelebih agi peranak rumah panjai di Bukit Begunan beguna amat nentuka ketuai Perintah Sarawak ulih nampung pejalai projek pemansang ditu,” ku iya madah nyemetak.

Mong mansutka jaku nya lebuh nyuaka agih belanja RTP dikena ngentak rumah panjai baru ba Rumah Merikan Banting, kemari.

Ba lansa bukai, Mong madahka bemacham projek udah enggau deka digaga Perintah Sarawak ungkup peranak dia.

Beserimbai enggau pengawa sehari nya, Mong mega udah dipebasa bejadika pengawa nasih tanah taba ngentak rumah panjai baru sida Merikan serumah.

Suara Sarawak