Rumah panjai angus dipelaba sengaja ditunu

MUKAH: Sepenyampau 36 iku ari lima pintu bilik Rumah Tingang Anjang, Sebakong Mukah semina tinggal gari ba punggung pengudah rumah panjai sida angus lengis malam tadi.

Ba penusah urung pukul 11.30 malam nya, sida serumah semina ulih ngelarika diri lalu nadai sebarang penusah bebadi nyawa diripot nyadi.

Komander Operasi PPgB Azman Hanapis madahka piak Bomba enggau Penyah Penusah (BBP) Mukah nerima kangau ngenyit urung pukul 11.56 malam.

“Pun penusah enggau penyampau pengerugi agi dipansik,” ku iya nerang.

Nitih ku penerang ari siku ari peranak rumah panjai nya, penusah dipelaba sengaja dikereja siku ari sida serumah ti bisi mansutka jaku emba deka munuh diri lebuh polis datai dia.

“Penusah nyadi pengudah polis ngejang ari endur nya lalu saspek ngelarika diri ngagai kampung besemak.

“Saksi ti mega bini saspek, Senorita mega madahka pekara ti sama,” ku iya.

ANGUS LENGIS… Lima pintu Rumah Tingang Anjang angus lengis malam tadi.