ARTIKEL

Rumah panjai chelap lindap, mansang nyegang

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

TIGA hari sebedau Gawai Dayak apin lama ti udah, pengawa ti patut iya rami bebali nyadi penusah ba bala peranak Rumah Panjai Selusin, Sungai Maram, Jalai Wak, Julau pengudah 80 peratus ari rumah sida angus diempa api.

Penusah nya ngujung ke 76 iku peranak rumah panjai 15 pintu dua ringkat nya semina tinggal gari ba punggung.

Ruai enggau bilik tinduk ba ringkat atas angus lengis tang nasip manah bilik tengah ba belakang ulih diselamat lalu semua peranak rumah panjai nya mujur nyelamat diri.

Kena malam 1 June, lebuh mensia mayuh ngintu Hari Gawai, bisi 80 iku peranak 12 pintu Rumah Nglai Usit ba Pulau Dudong, Jalai Salim-Stabau enda jauh ari Sibu lenyau endur ngenduh pengudah rumah panjai sida angus lengis.

Taja pia nadai orang bebadi ba penusah nya, semina Tuai Rumah Nglai empu ke bisi bakal lebuh iya nguji madam api.

Anak iya, Jimmy Nglai madah bala sida serumah benung richah ngintu Gawai ba ruai lebuh penusah nya nyadi.

Apai iya bisi nyium bau utai angus sebedau iya meda sebun pansut ari siti bilik.

Tuai Rumah Nglai berumban ngabas bilik nya, tepeda ke api benung mau ba siti bilik tinduk lalu minta tulung sekeda peranak rumah madamka api ngena dua kereban pengerara api tang api majak mau lalu ngerekai nyentuk ke iya enda ulih dipadam.

Penusah nya nyadi enggau jampat ngujung ke mayuh sida serumah enda sempat nyelamat reta tengkira sida.

Semua peranak ke napi penusah nya diatu ngenduh ba rumah panjai ti semak sereta ba rumah kaban belayan.

Sida ke napi penusah nya udah diabas sekeda pemesai perintah ke bisi meri bantu baka pekayan, pemakai enggau duit dikena ngelempung tating penusah sida.

Kelimpah ari nya, sida dilalau minta jali ari Gerempung Pemansang Pengawa Berumah Sarawak (HDC) ngambi ulih ngaga rumah panjai baru.

Ku Mandal Chairman Kaunsil Pelilih Menua Pesisir Sibu (MDLBS), Kaunsilor Wong Ching Yong, jali nya nadai bungai lalu ninting pintu deka bulih RM30,000.

Kelimpah ari nya, Kaban Parlimen Lanang, Alice Lau Kiong Yieng mega bisi meri bantu kilat RM12,000 ngagai sida ke tusah ketegal penyadi nya, tauka RM1,000 sepintu.

Kena pagi 1 June mega, tiga buah rumah ‘setinggan’ endur diau 47 iku orang ba Pujut 1B Jalai Miri-Pujut mega ditepan penusah angus.

Dua iti rumah angus lengis diempa api lalu siti rumah semina angus 20 peratus.

TINGGAL KENANG… Penusah rumah angus di Rumah Nglai Usit.

BEJEJAGA MAYA KEMARAU

Penusah rumah panjai angus, kelebih agi maya musin pengerami, enda tau enda diputar enggau engkeman laban iya ulih ngujung ke mensia bebadi nyawa lalu reta tengkira lenyau.

Tuai Polis Pelilih Julau, Deputi Superintendan Polis DSP Andam Sulin ngelalau mensia mayuh nyaga diri enggau reta tengkira sida kelimpah nyeliah ke diri ari ngereja pengawa ti ulih ngujung ke penusah angus.

Ku iya, menua ti rangkai ketegal gaya hari ti angat ulih ngujung ke api ngerekai enggau jampat lalu nyadi pengerusak ti besai kelebih agi enti iya nyadi ba rumah panjai.

Rumah angus endang penusah ti enda ulih disadang, lalu semua dilalau meruan bejejaga.

DUNYA MAJAK ANGAT

Gerempung Meteorologi Dunya ke ngemata sereta mansik gaya mua hari di serata dunya bisi ngaga ripot ti madah dunya kitai ditaga deka ngasaika tikas pengangat ti tinggi agi ari ngelama tu dalam kandang lima taun ti deka datai.

Iya dijangka ngelui tikas pemadu tinggi ti udah ditetap dalam Sempekat Klimet Paris, iya nya 1.5 Celsius atas tikas sebedau jeman industri.

Tikas pengangat dunya ti majak tinggi, perintah patut bejalaika pengawa ti engkeman agi dikena nyapai tagit pemansut gas gadung.

KENANG PAIT

Enti aku ninga bisi rumah panjai angus, aku endang ingat ke rumah panjai kami ba Sungai Poi, Kanowit ti ambis angus ba taun 1986.

Maya nya aku benung belajar ba Institut Teknologi MARA (ITM), diatu Universiti Teknologi MARA (UiTM), di Kuching.

Aku semina nemu pasal penusah nya berapa hari udah penusah nya nyadi ari apai aku lebuh aku betelefon ke rumah ngena ‘public phone’. Telefon binching apin bisi maya nya.

Lebuh nya suba, enti kami deka pulai ke menua, kami nepan tungkang China tauka ngena perau injin sangkut ari Kanowit nengah Batang Rajang ngelama sejam lebih sebedau kami tama ngagai Sungai Poi nuju Nanga Peranan urung setengah jam.

Aku bisi peluang pulai ke menua maya pemisi lalu naka meh penyinu aku meda pendiau rumah lama ti semina tinggal abus enggau dua tiga iti tiang ke udah chelum.

Pekara ti tinggal semina kenang aja.

Lama mega sida serumah enda belabuh ngaga rumah panjai baru, asai ke dua taun enti enda silap aku, laban bekelikuh ke gaya rumah ti deka digaga baru.

Bisi nya deka ke rumah panjai beringkat dua lalu ke bukai deka ngetanka gaya rumah lama.

Meda nadai pemutus, apai aku lalu mutus enggau niang aya aku, Pengajar Anum Mering, nirika tiang pemun ke tau nyadi malin dikena bala kami serumah ngaga bilik sida muak ke ulu enggau ke ili.

SUNTUK AI

Lebuh begawai tu tadi, Tuai Rumah kami chukup beratka pengelikun lebuh bebela.

Disebut belama nya dalam lalau iya ngagai bala serumah laban enti udah berami enggau begagai, kitai selalu enda ingat ke pengelikun.

Pengawa berapi maya bisi pengerami endang di tanju mega lalu enti sema nyumai mega ba dapur di belakang rumah, api dapur meseti ditentu ke udah dipadam.

Taja pia, bisi pengurang besai ti ngirau ke ati.

Rumah Philip di Nanga Peranan, Sungai Poi endur aku ngintu gawai udah disambung ngagai grid karan perintah lalu kitai beterimakasih ke penyenang ti diasai semua peranak dia.

Tang iya bedau disambung ngagai grid ai paip perintah taja pen Jalai Kanowit-Kapit ti mansa menua nya udah lama tembu.

Peranak menua dia semina ngarap ke ai ari bukit enggau ai ujan ke ditimbun dalam tung besai.

Puas aku berunding, baka ni enti sema rumah angus baru?

Kitai ngarap ke bala pengari rayat enggau perintah berunding beamat-amat ke penanggul nya.

Minta sida nyambung lengkas paip ai ngagai rumah ke udah dipansa jalai, ukai semina ba menua kami, ba selampur Sarawak mega.

TEGAP KE AGI JKKK

Komiti Pemansang enggau Pengelikun Rumah Panjai (JKKK) endang bejalaika pengawa ti beguna amat.

Pemujur enggau pengelemi JKKK endang bepanggai ba bala tuai ke ransing ngereja pengawa, baka nanam bungai tisi rumah, nyaga pemeresi, ngias rumah, nyeleti tanju ba mua enggau belakang rumah, ngadu parit, enggau mayuh agi.

Kelimpah nyaga pemanah enggau pemansang rumah panjai, sida meh nentuka pengelikun rumah panjai, nyengkaum masang pili bomba enggau meresa sambung karan ngambi iya meruan likun.

Anang enda ngelawa opis perintah, anang enda ituk minta agih belanja ari bala pengari rayat enggau menteri laban duit enggau asil ti diulih perintah endang datai ari rampa menua kitai.

Agi mayuh amat pemansang ti agi tau digaga kitai ba rumah panjai ngambi ke rumah panjai kitai meruan chelap lindap, beresi tuchi, rurus kudus, senang lantang sereta mansang nyegang.

BERITA LAIN

BERITA TERBARU

‘Strongman Challenge’ tarik minat orang awam

KUCHING: Penganjuran pertandingan ‘Strongman Challenge’ dapat menggalakkan gaya hidup sihat dan minda yang kuat dalam kalangan anggota polis serta orang awam. Komandan Pulapol Kuching, SAC