SIMANGGANG : Transformasyen Rumah Sri Aman nyadi muzium ti dipelabaka tembu taun baru chukup engkeman dikena ngenang taun ti ke-50 Deklarasyen Sri Aman disain kena 21 Oktober 1973.
Menteri Dagang Temuai, Industri Kreatif Enggau Seni Pemerindang Datuk Seri Abdul Karim Rahman Hamzah madahka, iya melaba mayuh nembiak rebak baru enda nemu pemedis orang kelia sebedau sempekat pengelikun nya disain.
Ku iya, maya nya deka mindah ari Kuching ke Sri Aman pan rayat napi penanggul laban suah diatur perintah bekurung.
“Nya meh maya ti chukup mar lebuh pengidup kitai suah napi penanggul pengelikun.
“Ukai muntang endur kitai deka muru komunis. Nya alai, nengah pemansang Rumah Sri Aman ti benung diseruri diatu palan nya deka nyadi muzium, awakka nembiak rebak baru nemu baka ni sejarah sempekat nya enggau nemu baka ni Sri Aman bulih nama,” ku iya.
Iya ti mega Menteri Nembiak, Lumba Enggau Pemansang Dagang bejaku munyi nya rambau nangguhka Pesta Benak Sri Aman 2022 ti digulu Tuai Pemegai Menua Tun Pehin Sri Abdul Taib Mahmud ditu kemari.
Sapit Menteri Pelajar, Inovasyen Enggau Pemansang Penau ll Datuk Francis Harden Hollis, Residen Bagi Menua Sri Aman Sirai Daha enggau Sapit Residen Bagi Menua Sri Aman ti mega Chairman Komiti Pengatur Pesta Benak Sri Aman 2022 Elvis Didit mega bisi datai.
Ku iya, nya kebuah perintah deka nentuka muzium tu ulih tembu, awakka pengawa bejadika palan nya ulih nyadi siti ari program taun baru dikena mantaika sejarah pengidup sebedau Sempekat Sri Aman diatur.
Dulu ari nya, iya muji pengerami Pesta Benak Sri Aman 2022 ti ke-19 laban udah ngayanka Mengeri Benak Malaysia nya ngagai renggat dunya.
“Pesta Benak Sri Aman nyadi sebuah ari program ninting taun ti udah dipasukka dalam kelinda dagang temuai Sarawak dibaruh Opis Menteri Dagang Temuai, Industri Kreatif enggau Seni Pemerindang.
“Mayuh bansa aktiviti enggau program ti diatur bala komiti sepengelama tiga hari.
“Tu ngasuh Pesta Benak Sri Aman majak dikelala enggau ditemu mensia mayuh nyentukka Benak Sri Aman diaku entara benak pemadu manah ba dunya.
“Diatu mengeri Simanggang udah bulih nama Mengeri Benak Malaysia lalu bala temuai suah datai ke Simanggang ketegal deka meda kediri penyelai pangka pasang benak,” ku iya.
