KEKADANG kitai nemu leju meda gaya, pisin, tusun atur enggau perengka dalam rumah kitai tauka rumah orang bukai ninting hari.
Kebuah pia laban nyau besehari-sehari siang enggau malam kitai meda pekara sebaka dalam rumah kitai taja pen orang suah madah ‘rumah kitai, serega kitai’.
Bisi maya kitai nguji deka ngiga tauka nyerungkai gaya, pisin, tusun atur enggau perengka dalam rumah ti nyelai, bisi pengelain ari rumah bukai sereta jarang tauka enda kala dipeda kitai.
Nya alai, serak tu, aram kitai nemuai ngagai Rumah Tunsang Kuching tauka Upside Down House Kuching ti bepalan ba No. 281-1-1, Lot 282, Jalai Borneo, Off Jalai Tunku Abdul Rahman ditu iya nya semak Tebing Sungai Sarawak tauka Waterfront Kuching.
Keterubah kitai ninga senentang nama ‘rumah tunsang’, tentu kitai alit ati enggau betanya lapa rumah nya dikumbai ‘rumah tunsang’?
Nya pekara keterubah disagam dalam runding enggau ati kitai din laban kitai sigi nadai kala meda rumah tunsang laban perabung rumah sigi ba atas nunga langit mingkai.
Pia mega, perengka tauka barang dalam rumah sigi ba baruh magang meruan diengkah enggau ditusun ba endur sida empu.
Tang semua nya bebida 180 peratus pengudah kitai nemuai ngagai Rumah Tunsang Kuching.
Ngenang lenak agi senentang Rumah Tunsang Kuching tu, semua perengka dalam rumah baka bangku, mija, katil, tilam, jemari, tikai enggau ti bukai ti endang suah diengkah ba lantai rumah kitai ngelama tu nyau empikap ba siling rumah nya magang.
Pia mega, perengka bukai baka kipas siling, lampu siling, aircond enggau ti bukai ti suah diengkah kitai ba siling rumah nyau telakih laban diengkah ba lantai rumah tu.
Nyadi kitai ti tama enggau bejalai dalam Rumah Tunsang Kuching tu pen enda nyalah baka ti bejalai niti siling rumah.
Pekara nya chukup ngalitka ati laban semua utai dipeda kitai dalam rumah tunsang nya nyau ngelaban ukum graviti munyi ku kitai kemaya hari tu.
Nya alai, mensia mayuh diperansang sampal datai bebaika diri sebilik ngusung Rumah Tunsang Kuching nya ngambi bela ngasaika peneleba nyelai ti jarang diasaika kitai besehari-sehari.
Bayar tama ngagai rumah tunsang tu semina RM15 ungkup orang besai tuai enggau RM10 ungkup nembiak mit.
Nambahka nya, rumah tunsang nya dibuka ngagai mensia mayuh ninting hari nyengkaum ujung minggu enggau kemisi hari besai.
Palan nya dibuka berengkah ari pukul 9.30 pagi nyentuk 6 lemai ninting Hari Satu nyentuk Hari Lima tang Hari Enam, Hari Minggu enggau maya kesimi hari besai dibuka pukul 9.30 pagi nyentuk 7 malam.
