Rumah ungkup M40 digaga di Batu Kawa

KUCHING: Perintah Sarawak deka mantu ruang bilik M40 ngembuan rumah kediri empu lalu kerejasama diatur enggau Kompeni Sendayan Group ngambi ngaga 287 unit Rumah Sri Pertiwi enggau 29 unit Rumah Spektra Medium ti keterubah di Arora Square Batu Kawa.

Menteri Kaunsil Kandang Menua enggau Pengawa Berumah Datuk Sri Prof Sim Kui Hian madahka Perintah Sarawak andal nyema semua rayat menua tu ulih ngempu tauka ulih meli rumah kediri.

“Isu pasal rumah ukai semina ditapi rayat Sarawak aja tang isu tu endang nyadi buah mulut selampur dunya.

“Ngambika ulih nyata nyadi, Perintah Sarawak ngaga rumah ungkus mimit (rumah kos rendah) baka Spektra Permata, Spektra Light, Spektra Medium nyengkaum rumah Sri Pertiwi ti dituju ngagai ruang bilik M40,” ku iya.

Kui Hian bejaku munyi nya lebuh bejadika Program Nasih Tanah Rumah Sri Pertiwi di Aurora Square Batu Kawa ditu, pagi tadi.

Ku iya, tu projek keterubah Perintah Sarawak enggau sektor peribit ngatur kerejasama ngaga rumah iya nya sebagi ari inisiatif perintah mantu rayat ngambika ulih ngempu rumah kediri.

“Enti ulih kitai anang nyuwa, manah agi kitai empu meli rumah laban pengudah bepuluh-puluh taun dibayar dia rumah nya deka enggi kita.

“Rumah Sri Pertiwi tu endang patut laban rega rumah nya baruh ari RM300,000 ti endang engkeman nuju orang biak ti baru bulih gawa, baru jadi melaki bini, baru badu sekula enggau nembiak baru ti deka ngati kediri,” ku iya. Berita penuh dibantai ba Suara Sarawak pagila.

Suara Sarawak