Rumah ungkup rebak baru

KUCHING: Perintah Sarawak benung ngemajuka lima palan berumah ulih dibeli ditu kelebih agi nyendiaka rumah ungkup rebak baru.

Ku Kepala Menteri Datuk Patinggi Abang Johari Tun Openg, tu dikena mutarka penanggul ditapi sida ti udah nirika ruang bilik.

Kebuah penanggul tu nyadi laban rega rumah majak niki ninting taun ngujungka sida enda tebelika rumah.

“Nya kebuah kitai deka berimbaka endur baru, numbuhka genturung pendiau sereta berumah.

“Tu entara insiatif kitai mutarka penanggul ditapi rebak baru bebelika rumah,” ku iya rambau Pengerami Aidilfitri Parti Pesaka Bumiputera Bersatu (PBB) Zon Kuching, ditu tadi.

BERAMI… Abang Johari, Awang Tengah, enggau bala ketuai GPS sereta ketuai PBB begambar ungkup kenang rambau Pengerami Aidilfitri PBB Zon Kuching, ditu tadi.

Sama datai Sapit Kepala Menteri ti nyadi Sapit Presiden PBB Datuk Amar Awang Tengah Ali Hasan enggau Menteri Kaunsil Kandang Menua enggau Pengawa Berumah, Datuk Dr. Sim Kui Hian.

Ku Abang Johari, entara kandang menua deka dikemansang endur berumah baka Bako-Buntal, Sungai Maong – Segedup, Gita Baru, Kampung Senari enggau Lundu-Sematan.

Iya mega udah ngerah Opis Tanah enggau Survei bejalaika pengawa nyukat tanah dia.

Pia mega ku iya, genturung pendiau baru tu ila deka disikap enggau bekal ai enggau kuasa karan, sistem parit semin enggau jalai belakin lalu semua tu dibayar perintah GPS.

“Sida semina mayar ungkus ngaga rumah aja, entara RM80,000 ngagai RM100,000.

“Kitai mega bisi nyendia bantu pinjau ngagai sida nengah Mutiara Mortgage enggau Finace ti diempu GPS,” ku iya,

Kelimpah ari rega rumah mudah agi, perintah nengeri mega deka nurunka rega premium lot tanah ngagai RM2,500, ku Abang Johari nerang.

Ku Abang Johari, timpuh mayar pengelama 10 taun lalu sida semina mayar lot tanah urung 12 point pemesai, RM250 setaun.

Suara Sarawak