RUU disukung enti isi iya ngemantup ati – Nanta

KUCHING: Gabungan Parti Sarawak (GPS) deka nyukung Rang Undang-Undang (RUU) Konstitusyen (Ubah) 2019 nyema tepantup ati enggau ubah ke dilanggur lalu iya meri pemaik ngagai rayat.

Taja pia, Sekretari Besai GPS Datuk Alexander Nanta Linggi madah Sarawak kebendar bedau meda isi ubah ke dilanggur nya.

Pia mega, ku iya Putrajaya enda nerang ngagai GPS pasal langgur ubah nya dikena mulaika baru status Sarawak enggau Sabah nyadi bakih sebaka enggau Semenanjung.

“Kami deka meda ubah ke dilanggur nya sebedau dibantai ngambi kami nemu nama utai ke deka dibanatai.
“Nyema deka ngasuh kami nyukung, berandau dulu enggau kami,” ku iya kemari.

Kaban Parlimen Kapit nya madah Sarawak mega nganti nyentuk Komiti Pemandu Sempekat Malaysia 1963 (MA63) datai enggau pekara ke ditemu sereta dilanggur nya.

“Lebih beguna iya nya isi dalam MA63, ripot komiti entara perintah enggau Ripot Suruhanjaya Cobbold,” ku iya.
RUU Konstitusyen (Ubah) 2019 bekaul mulaika hak-hak ke dipekat dalam Sempekat Malaysia 1963 dibantai ungkup bacha ti keterubah ba Aum Parlimen kemari nengah Menteri ba Opis Menteri Besai, Datuk Liew Vui Keong.

Taja pia, sebedau RUU dibacha ungkup ti keterubah, Aum Parlimen begau lebuh mayuh Kaban Parlimen lebih agi ari Sabah enggau Sarawak angkat mantah penerang ke dibantai lalu madah nadai nerima notis dalam timpuh 24 jam dikena beratika isi RUU nya.

DATUK ALEXANDER NANTA