RUU: Perintah Sarawak bedau ngaga pemutus

Taja pia Sarawak tetap nyukung RUU nya nyema ubah iya pulaika pemaik rayat enggau nengeri

“Naka tu, kami (perintah nengeri) enda ulih meri timbal laban kami bedau meda Rang Undang-Undang nya, nadai mayuh penerang bekaul enggau langgur nya.”

KUCHING: Sarawak bedau ngaga pemutus bekaul enggau ubah ba Pekara 1 (2) Konstitusyen Perintah Besai ti dilanggur deka nyadika Sabah enggau Sarawak kaban kunsi Semenanjung.

Chairman Komiti Perunding Sempekat Malaysia (MA63) Sarawak, Datuk Amar Mohamad Asfia Awang Nassar madah naka ke diatu piak sida enda ulih meri timbal bekaul enggau pekara nya dataika maya Rang Undang-Undang (RUU) ti dilanggur nya dipeda sida komiti.

“Naka tu, kami (perintah nengeri) enda ulih meri timbal laban kami bedau meda Rang Undang-Undang nya, nadai mayuh penerang bekaul enggau langgur nya.

AUM PEMBERITA… Asfia (duduk, kiba) rambau aum penerang berita begulai enggau bala komiti ke bukai di Begunan Kunsil Nengeri (DUN), kemari.

“Taja pia, kami nyukung ubah ti digaga ba Konstitusyen Perintah besai tauka undang-undang bekaul enggau pekara tu enti nyema perkara ke ditambah nya bekaul hak rayat enggau pemaik Sarawak,” ku iya.

Asfia madah munyi nya lebuh aum penerang berita pengudah Aum Komiti Perunding MA63 Sarawak begulai enggau Kepala Menteri, Datuk Patinggi Abang Johari Tun Openg di Kompleks Dewan Undangan Nengeri (DUN), kemari.

Menteri ba Opis Menteri Besai (Undang-Undang) Datul Liew Vui Keong apin lama ke udah madah kabinet pusat udah setuju ngaga ubah dalam Pekara 1 (2) Konstitusyen Perintah Besai ti deka nyendiaka Sabah enggau Sarawak nyadi kaban kunsi Semenanjung Malaysia.

Berebak enggau nya, Asfia ri nyadi Speaker DUN madah perkara ti dirandau sida Komiti Pemandu MA63 Perintah Besai bejalai enggau manah taja pia apin bisi pemutus ari perkara nya.

Taja pia ku iya, ketegal randau nya tadi agi ba kategori rahsia, nya alai sida enda tau madah pasal isi ke bisi dalam pekara nya diatu.

“Kami beratika tu siti pekara ti beguna ngagai Sarawak enggau menua tu.

“Nya alai, kami sanggup nganti seriris enggau jam ti udah disetuju Komiti Pemandu MA63 Perintah Besai.

“Pekara tu deka dipadah ngagai orang mayuh enti udah datai ba maya ti ngena pengudah ripot ari komiti nya diputuska,” ku iya nambah.

Suara Sarawak