KUCHING: Serimbai Program Ngintu Jubli Emas Ke-50 Taun Gerempung Nembiak Nasional Beserakup Sarawak (Saberkas) bejalaika Kimpin Meri Darah Saberkas.

Sekretari Politik Premier Sarawak ti mega Mandal Presiden Saberkas Abang Abdul Aziz Datuk Abang Rauf madah. pengawa dikemujur nengah kerejasama Gerempung Anak Bulan Mirah (PBSM), Sepital Besai Sarawak (SGH) enggau Farley Kuching

Ku iya, mayuh program diatur sepemanjai taun 2023 ngaul gerempung nya ba renggat unit, pampang enggau raban tuai nengeri.

“Baka sehari tu, kami ngatur Kimpin Meri Darah Saberkas tu meransang mensia mayuh sedarka pemanah pengawa meri darah,” ku iya.

Aziz bejaku munyi nya ba aum pemberita Kimpin Meri Darah Saberkes ngarika Menteri Nembiak, Lumba enggau Pemansang Dagang ti mega Presiden Saberkas Datuk Seri Abdul Karim Rahman Hamzah ba Farley Supermarket ditu tadi.

Ku iya, kelimpah nambahka penyedar, kimpin nya mega mandangka penyiru mensia mayuh ngagai pesakit ti begunaka darah.