Sabun organik chap ‘Homemade Soap IsNia’ ngasi merubat penyakit kulit

BAU: Kamallina Sador belajar ngaga sabun organik nyentukka pengawa nya mujur nyadi dagang sereta nyaup nambahka penatai pemisi sida sebilik.

Kamallina madahka iya teulihka runding ngaga sabun organik tu pengudah sinu ngenang menyadi iya ditepan penyakit kulit tauka dikumbai Ekzema ke enda nemu suman taja bendar berubat.

Pia mega, iya berasai gaga laban sabun digaga nya mujur nyumanka penyakit kulit ti nepan menyadi iya pengelama dua taun lalu ulih suman ba timpuh dua bulan aja.

“Terubah suba, aku belajar ngaga sabun organik tu laban sinu ngenang menyadi aku ngenatka pemedis.

“Sinu meda iya ditepan penyakit kulit ba dua piak kaki, kadang nyau kembai enggau merekah kaki tudah.

BAKA TU… Kamallina nunjukka chara ngaga sabun organik iya.

“Menyadi aku mega nyau bendar berubat nyengkaum betemu enggau pakar sereta lutur sakit kulit ari Kuching dataika ba Johor.

“Taja bendar berubat sereta beribu ringgit duit abis tang agi ga penyakit iya enda suman.

“Ari nya tadi, aku bendar berundingka chara ti muntang ngujungka aku berengkah ngaga sabun organik.
“Baka ke ditemu kitai, sabun organik tu ngasi dikena ngubat sakit kulit taja lubah suman.

“Pengudah dua bulan ngena sabun enggau krim digaga aku nya, kaki menyadi aku nyau suman sereta tudah mega badu ngenatka pemedis,” ku Kamallina lebuh dirandau Suara Sarawak.

Ungkup penerang semua ekzema nya sebansa penyakit kulit ke tau ngasuh tubuh kitai gatal sereta pedis lalu nadai ubat tang ulih ngurangka pemedis lebuh berubat ba pakar tauka lutur sakit kulit.

KELAS ONLINE

Kamallina madah, iya belajar ngaga sabun tu beberapa bulan nengah tiga kelas online ba Facebook enggau ngulu kus ngaga sabun ba Kolej Komuniti Kuching, apin lama ke udah.

“Aku belajar ari tiga iku pakar nengah online maya Atur Mindah Betagang (PKP) taun nyin kemari enggau mayar urung RM300 ungkup siti kelas.

“Ari nya, aku bisi diberi modul tauka penerang enggau video pasal chara ngaga sabun kediri.

“Tang sida semina meri mimit aja penerang pasal chara ngaga sabun ngujungka aku berundingka inisiatif bukai baka macham bemacham bup pengelama dua bulan.

“Lebuh ngaga sabun tu, kitai mesti milih minyak ti bekualiti enggau minyak pati nentuka sabun digaga kitai nya ulih nyumanka penyakit.

“Aku mega bisi ngaga resepi kediri nentuka sabun digaga nya tadi ngasi sereta ulih nyumanka penyakit kulit,” terang Kamallina ti mega graduet Degree Pentadbiran Awam ari Universiti Utara Malaysia (UUM).

Nambahka nya, iya madahka sabun tu nerima mayuh peminta ari bala bakih pengudah sabun nya ngasi sereta nyumanka penyakit kulit ditepan menyadi iya ngelama tu.

Iya mega setuju nyual sabun nya ngena chap dagang ‘Homemade Soap IsNia’ tiga bulan udah nya enggau rega ke patut.

Taja pia, Kamallina madahka pemar besai ditapi iya diatu iya nya ungkus ngaga sabun organik tu begunaka besai belanja.

Kebuah pia laban semua kereban dikena ngaga sabun nya mesti dibeli ari Semenanjung Malaysia kelimpah ari sekeda barang diguna nya jarang ditemu.

PUH… Kamallina puh ngaga sabun nentuka sabun nya ngasi enggau nyumanka penyakit bala penguna.

MAYUH GUNA

“Naka diatu, aku bisi nyual lima bansa sabun lalu ngembuan tuju iya empu ungkup bala penguna.

“Tu nyengkaum sabun oatmeal lavender ke manah dikena ngubat semua, sabun tumeric papaya manah dikena ngambi kulit burak enggau sabun rice flour tu manah ungkup kulit sereta sabun charcoal oatmeal manah dikena meresika mua.

“Pia mega, sabun bukai ti bisi digaga enggau dijual aku iya nya sabun sinus, sabun pigmentasi, sabun bidara moringa enggau sabun eczema tauka sakit kulit.

“Semua sabun nya dijual aku berega RM15 lalu semina sabun turmeric papaya aja berega RM25 laban ngena kereban ti manah dikena nyaga mua,” ku iya seraya madahka sabun nya ulih disimpan pengelama setaun ngagai dua taun.

Nambahka nya, iya ngaga sabun tu nengah dua chara iya nya proses belaie enggau tuang (MP) ke mega chara pemadu suah dikena iya seraya chara kedua nya proses sabun diasuh meku (CP).

“Naka diatu, aku nerima mayuh peminta sabun ekzema lalu aku bulih untung manggai RM1,000 sebulan.

“Sabun sinus mega laku laban bala penguna ti meli nya madahka sabun nya ngasi dikena ba timpuh seminggu aja.

“Aku ngelakuka produk sabun tu nengah media rama baka Facebook enggau Whatsapp kelimpah kami sebilik sereta bala bakih mega suah nyaup aku ngelakuka produk tu ngagai bala bukai,” terang iya.

Ba pengujung randau, Kamallina madahka iya baru bulih bantu program ‘satu kampung satu produk’ ari Opis Betanam Betupi Bau ngambi nirika bengkel enggau nyendiaka kereban dikena ngaga sabun organik tu.

“Bengkel tu deka didiri ba mua rumah aku pengudah Hari Raya Aidilfitri ila, udah nya aku deka ngerembaika produk tu ngagai makit luar dikena nyumanka sida ti ditepan penyakit kulit baka menyadi aku,” terang Kamallina.

Sida ke deka meli produk sabun organik tu, tau telefon ngagai Kamallina ba lumur, 010-8325063 tauka ngelawa ruai Facebook Kamallina Sador.

TAU UJI… Entara sabun digaga Kamallina.

 

TAU UJI… Entara sabun digaga Kamallina.

 

LAKU… Sabun ekzema tu ngasi dikena nyumanka penyakit kulit.

 

NGASI… Gambar kaki menyadi Kamallina, sebedau enggau pengudah ngena sabun ekzema digaga iya.

 

NGASI… Gambar kaki menyadi Kamallina, sebedau enggau pengudah ngena sabun ekzema digaga iya.

Suara Sarawak