Sada chuan baru pemansang Sri Aman

SIMANGGANG: Sri Aman Development Area’ tauka Sada deka nyadi chuan baru dikena ngelengkaska pemansang di Bagi Menua Sri Aman.

Kepala Menteri Datuk Patinggi Abang Johari Tun Openg madah, rayat Sri Aman betuah laban ngembuan pengari rayat ti chukup siru beratika pengidup rayat.

“Maya merarau ba kedai Tandang Sari tadi (kemari) sida (pengari rayat ditu) bisi minta ngagai aku, Sri Aman patut bisi chuan baru dikena ngemansangka pengawa betanam betupi, dagang temuai, bekal ai, karan enggau ke bukai.

” Nya alai, sida udah setuju nyiri Datuk Seri Rohani Karim nyadi ketuai (chairperson) Sada lalu iya deka disaup bala pengari rayat bukai,” ku iya.

Komiti tu deka bekerja sama enggau Sekreterari Perintah Nengeri Datuk Jaul Samion, EPU sereta opis perintah ke bekaul.

Iya madah munyi nya rambau Pengerami Makai Lemai beserimbai enggau Program Ketuai Begulai Enggau Rayat Sri Aman ditu, malam tadi.

Suara Sarawak