Sada nyawa indu Bajau mai lagu Iban dipuji 

“Kepuas ke nguji sereta tepantup ati enggau sada nyawa diri, dia aku sekali agi mai ati berani lalu ngemasukka (upload) video nya ba laman facebook aku.”

Pemanah sada nyawa siku indu polis bansa Bajau ari Sandakan, Sabah ti nyadaka sebuah lagu Iban di menua rama nerima timbal ke chukup manah ari mensia mayuh lebih agi bansa Iban.

Ba laman Facebook benama Dyana Artis Bajau Sabah indu tu mujur teulihka 4000 ‘like’ lalu video lagu Nubai iya mega teulihka sepenyampau 120, 000 iku orang meda nyentuk ke cherita tu ditulis kelimpah nerima mayuh jaku puji sereta timbal engkeman ari peranak Sarawak lebih agi bansa Iban ti sama tepaut ati ningga pengelandik iya nyadaka lagu Iban.

Berindik ari jaku sukung ari penguna facebook nya ngujungka pemberita nguji sereta lalu mujur mega ngerandau Dyana empu.

Dyana Nasrullah, 34 taun, tauka minta dikelala ngena nama kangau Dyana aja ba dunya pemerindang ke mega siku staf pengereja pengawa ba Opis Menteri Dalam Menua (KDN) Pampang Kota Kinabalu enggau pengelama 4 taun kenyau ari taun 2016.

CHAKAH BELAKUN…Sebuah Telemovie ke kala disereta Dyana.

BEPUN ARI PEMINTA KABAN

Pulai baru ngagai pun cherita, lebuh ditanya pemberita baka ni pemun iya rindu belagu Iban Dyana madah, semua nya bepun ari peminta siku kaban facebook iya benama Marilyn Nanta ti minta iya nyadaka siti lagu Iban tebilang ari penanyi asal Florence Lo (Tebeleka) pengudah ningga sada nyawa iya belagu ba aplikasyen smule lalu sada nyawa iya chukup engkeman mai lagu nya nitih ke dipadah Marilyn.

“Enggau enda berunding panjai kena ke 20 November 2019 aku nguji ngenatai ke peminta kaban aku Marilyn nya.

“Kepuas ke nguji sereta tepantup ati enggau sada nyawa diri, dia aku sekali agi mai ati berani lalu ngemasukka (upload) video nya ba laman facebook aku,”

“Enda nyangka video keterubah iya lagu Iban ke disadaka aku nya nerima timbal chukup manah ari mensia mayuh,”
“Bepelasar ari nya mega bala netizen meransang sereta minta aku terus nyada enggau mayuh agi lagu Iban pengudah tepaut ati ninga lalu meda penau tudah diri tambah mega siku artis ukai Iban ari luar Sarawak ti landik belagu Iban lalu ngujung ke aku enda malik ke belakang agi,”ku iya.

ARTIS BAJAU

LAGU BAJAU…Dyana endang udah lama ngeluarka album solo lagu-lagu Bajau.

Dulu ari nya,Dyana endang udah lama tebilang serata udah dikelala mensia mayuh di Sabah laban endang sigi artis (Lagu Bajau) sereta udah mujur udah ngeluarka dua iti album solo enggau duet sereta empat iti album kompilasyen tang semua album nya digaga lalu semina dijual ungkup makit din aja.

Kelimpah ari ngereja pengawa belagu, penanyi ti meletup lalu dikelala sereta tebilang nama nengah lagu “Siksa Pangentoman”(Siksa Dalam Kerinduan) tu mega bisi nyereka pengawa belakun filem lalu mujur nyadi siku ari pelakun ba dua bengkah telefilem dikumbai Daing-Daing The Movie (2011) enggau Siksa Pangentoman The Movie (2012).

Ngaku penyampau peminat tauka (Follower) majak nambah ba laman Facebook belabuh ari hari keterubah iya belagu mai lagu Iban, dia Dyana berasai ‘terhutang budi’ ngagai bala peminat iya ari Sarawak ti rindu ningga sera nyawa iya.

Enda masau jam, berengkah ari nya Dyana enggau naka ulih belajar chara nyebut leka jaku Iban ti betul sereta ngingatka lagu Iban enggau peransang ari bala bakih ti sama alai iya gawa kemega endang peranak asal Sarawak empu tang gawa nyadi polis ba Indu Opis Polis Kontinjen (IPK) Sabah, Kota Kinabalu baka Sub. Inspektor Robert Limin, Koperal Augustine Manggi Danggang, Jason Barat, Susanna George sereta enggau bala bakih bukai.

Naka tu penanyi ti ngembuan paras mua petul bekulit burak sereta udah bisi orang ngempu tu mega udah mujur nyadaka tujuh iti lagu Tebilang Iban nyengkaum lagu Nubai enggau Tebeleka iya nya Ati Nuan Ati Aku (Florence Lo), Ukai Peminta Tua (Lyssa Jean), Pengerindu Betuchik Laman (Winnie Albert) enggau Ai Mata Lelenggau (Florence Lo) sereta semua tu ulih didinga mensia mayuh ba laman facebook iya benama Dyana Artis Bajau Sabah.

MERINDANG….Dyana maya dikangau merindang begulai enggau Raban Kombo PDRM Sabah ba sebuah hotel tebilang di Kota Kinabalu apin lama ke udah.

“Meri besai terima kasih nuju bala peminat, lebih agi peminat ari Bumi Kenyalang setegal ari sukung, jaku peransang sereta buah penemu enggau tunjuk ajar kita semua aku ulih belagu dalam jaku Iban.”

“Tu mega mandang kaul peranak Sabah enggau Sarawak endang seruran rapit,seati,besukung sereta sepenemu enggau pangan diri kelebih agi baka ba pekara bekaul enggau dunya pemerindang tu,”ku iya nyemetak.

Nambah nya lebuh ditanya pemberita sentang juluk ati enti diberi peluang merindang meraka ke luar Sabah (Sarawak) iya madah,endang bisi ngembuan juluk ati deka datai merindang enggau ati gaga ba dedini alai selampur Sarawak tauka menua bukai laban nya siti ari peluang ti ulih dikena nambah lalu betemu enggau bala peminat kelimpah negap ke agi penuduk iya ba dunya pemerindang.

SEDIA MERINDANG DI SARAWAK

“Nadai salah nganggau aku merindang ditu, mega endang semampai diterima enggau ati gaga,”
“Ari kangau nya mega aku ulih betemu mua enggau bala peminat aku sereta kelai terima kasih laban udah nyukung aku ngelama tu,”ku iya.

Ungkup penerang, enda lama agi Dyana mega deka pansut baru enggau album solo keterubah ba taun 2020 ti diberi nama Dyana 3 lalu ngundan lima iti lagu Etnik Bajau Pantai Timur Sabah tang sayau semina ungkup makit dunya pemerindang nengeri Sabah aja.

Nuju bala pengatur pengerami selampur Sarawak enti nyema bisi ati deka mai Dyana belagu tau mega nguji berandau enggau iya empu nengah media rama (Whatsapp) 013-8906699 (Dyana) sereta tau mega nganjung peminta nuju email dyanagrande@gmail.com.

Suara Sarawak