Mayuh unit ditumbuh dikena negika main asal enggau nyaup mutar penanggul ditapi komuniti

KUCHING: Serakup Dayak Iban Sarawak (Sadia) sebengkah gerempung ukai dikuasa perintah (NGO) ti seranta tang taja pia chukup bebendar negika tauka ngangkatka main asal pupu bansa di Sarawak, ku Presiden iya Sidi Munan.

Iya madah mayuh unit udah ditumbuh dalam Sadia dikena ngangkatka main asal sereta nulung mutar penanggul ke ditapi komuniti Dayak.

“Ambika banding, Akademi Sadia (Asadia) iya nya sebengkah unit ngemeranka pengawa ngelatih rebak baru ba pengawa main asal.

“Nya alai, sebarang tulung tauka sukung ngagai Asadia endang deka diempu Asadia.

“Kelimpah nya, Sadia mega bisi unit ti mantu mutar isu tanah sereta ngetanka tanah kitai bansa (Dayak) enggaika dikeruga orang sengapa.

“Udah nya, kitai bisi unit pelajar dikumbai Sadia Apan Krian betuaika Andrew Paul. Sida tu suah ngatur program meri jaku peransang sereta licha pelajar chara moden,” ku iya.

Iya madah munyi nya ba Pengerami Beserumpu Tamat Kelas Main Asal enggau Bejadika Main Asal Belikan ba Christian Ecunemical Worship Centre, Jalai Stampin ditu, apin lama ke udah.

Ngelansa pasal pengerami nya, entara main asal ke bisi dibantai ngagai bala temuai iya nya tabuh ajat, kuntau, tabuh ngambi indu, sape, belikan, birejang beuh, ajat Orang Ulu (Kajen Doh), ajat indu Iban, ngayanka marik empang enggau kain burie (Basong Taah).

Semua nembiak ke udah tamat kelas main asal bela nerima setipikit diri.

Sama bisi datai Menteri Muda Nembiak enggau Lumba Datuk Snowdan Lawan enggau Ketuai Asadia Mabong Unggang.

TAMAT KELAS…Entara nembiak ke udah mujur nembuka kelas main asal sida ba Asadia.

 

LUNDAI…Ajat Orang Indu mega bisi dipandang ba pengerami nya.

Suara Sarawak