KUCHING: Premier Sarawak Datuk Patinggi Tan Sri Abang Johari Tun Openg andal bisi peluang besai entara Sarawak enggau Republik Korea bekerejasama ngasilka minyak bilun (SAF).

Ku iya, kerejasama tu beguna amat seriris enggau juluk Sarawak ngalih ngagai pemansang pemansut minyak bilun altenatif baka SAF.

“Kami ngarap ulih bekerejasama enggau Republik Korea lebih agi dalam pengawa mansik, pemansang enggau komersil teknologi pemansut ti dikemanah enggau bahan ti inovatif,” ku iya.

Abang Johari mansutka jaku nya beserimbai enggau Randau Dagang Kuasa Sarawak Korea ba sebuah hotel tebilang ditu, kemari.

Sama bisi datai, Duta Republik Korea Lee Chi Beom.

Abang Johari madahka sida keran ngemansangka pekara tu pengudah Sarawak nengah Kaunsil Pemansang Ekonomi Sarawak (SEDC) bekerejasama enggau Airbus enggau Rolls Royce nengah Palan inovasyen Aeroangkasa Malaysia (AMIC) bejalaika pansik enggau pemansang pasal hidrogen gadung enggau minyak nyadika minyak bilun di Demak.

Ku iya, kerejasama SAF nya inisiatif ngemansangka minyak bilun seriris enggau tuju industri penerebai ngelepas karbon ti beresi.

“SAF mega ulih nyadi kunchi penerebai bilun ti meruan agi pengudah bekenaka minyak ti kurang karbon enggau badu bekenaka karbon dalam industri penerebai,” ku iya.

Iya mega madah, biodiesel enggau e-methanol ulih nyadi siti agi chara nyungkak industri penerebai enggau marin nyadika minyak ti kurang karbon.

Berebak enggau nya, iya madah, pengawa ngerembaika pemansut SAF domestik ulih mantu nyaga pemanah industri biofuel enggau ngemansangka ekonomi baru sereta nyendiaka peluang kereja ba selampur menua.

“Aku pechaya bisi peluang besai entara Sarawak enggau Korea bekaul SAF tu ke ulih nyerungkai pemanah ungkup pekara rama, rampa menua, ekonomi tambah ari pengawa nyendiaka peluang kereja ngagai nyaga tanah ngagai nambahka pengelanchar bilun,” ku iya.