ARTIKEL

CHANG LIH KANG

Saintis Biak ngerandang inovasyen baru

Facebook
Twitter
LinkedIn
WhatsApp
Telegram

SAINTIS biak ba Malaysia nya orang pemadu berega ngagai menua nyadi penyungkak enggau pengerandang adan inovasyen baru, ku Menteri Sains, Teknologi enggau Inovasyen, Chang Lih Kang.

Ku Chang, nya kebuah Young Scientists Network-Akademi Sains Malaysia (YSN-ASM) nyadi pelasar nempa rentayan enggau kerejasama tegap begulai enggau institusyen antarabansa.

Pia mega ku iya, kerejasama nya mega ngena pengelandik enggau penemu sida ngerandang Sains, Teknologi, Inovasyen enggau Ekonomi (STIE) Malaysia.

“Tanggungpengawa YSN-ASM kelebih agi bejalaika projek bepelasar ke misyen mungkur pengerembai teknologi baru baka teknologi enggau sistem pintar, mengeri enggau pengangkut, betanam betupi enggau kampung, rampa menua enggau biodiversiti nya beguna endar.

“Nya kebuah, saintis biak meseti sedia napi pemar, penyarut enggau pengawa besibil nuju sains lalu berumban masai enggau teknologi baru tu sereta ngena penemu ari bemacham pekara,” terang iya.

Chang nibar jaku nya lebuh Kolokium YSN-ASM 2023, empai lama.

YSN-ASM ti ditumbuh kena 12 Disember 2012 nya nyadi pelasar saintis biak mantaika sadang penemu sida sereta mantu komuniti.

Ungkup penerang, YSN-ASM tu datai ari lapan raban baka Komunikasyen Sains, Pelajar Sains, Integriti Sains, Nyadi Tuai Sains, Program Ngaul Sains, Polisi Sains, Kerejasama Pengawa Mansik enggau Sains@Media.

Kolokium YSN-ASM ti diatur ninting taun ditampung nyadi palan sida betemu, bekelala, nempa rentayan enggau ngelanggur program ngemansang STIE negara.

Naka diatu, YSN-ASM bisi 299 kaban ba selampur menua.

“Dikena negapka ekosistem STIE menua, kitai meseti nambah peratus pemansik dalam industri bechunto ke Thailad enggau Singapore ti ngembuan lebih ari 50 peratus pemansik dalam sektor industri.

“Nya alai, aku minta YSN-ASM ukai semina chakah ngaul diri tang mega begulai ngemansang industri nengah start-up enggau spin-off sereta nyadi mentor ngagai rebak saintis biak dudi hari nyadi pemansik dalam industri,” ku iya.

Dulu ari nya, Chang ngulu randau begulai enggau kaban YSN-ASM.

Ba randau nya, iya udah nyaut tanya bekaul Pelajar Sains, Teknologi, Injiniring enggau Matematik, belanja ungkup Pansik enggau Pemansang (R&D), komersil pansik, empas STI sereta kerejasama entara opis menteri.

Ba pengawa sebaka, Chang udah bejadi pengawa nyuaka anugerah ngagai pemenang Anugerah Chrysalis YSN-ASM.

Chrysalis nya program YSN-ASM dikelala ngelala, ngemansang, ngaku enggau negapka nembiak PhD sereta meri peransang ngagai sida mantu komuniti.

Sepanjai program, 15 finalis dinilai nitihka penemu, semangat, tuai, kreativiti, kereja beraban enggau penau mantaika asil sida.

Finalis Chrysalis YSN-ASM ti dipilih deka diberi sukung enggau embing ungkup lima taun agi pengudah program.

Inisiatif nya nentuka bala finalis tu ditegap nyadi pemansik nyulut ti deka ngemansang ekosistem STIE Malaysia.

Chalun ti engkeman deka diasuh masuk program felo tauka latih ba institusyen enggau organisasyen nyulut.

LAIN-LAIN BERITA

BERITA TERBARU

SAR hari kelima, bayi 18 bulan belum ditemui

KANOWIT: Operasi mencari dan menyelamat (SAR) seorang bayi lelaki berusia 18 bulan yang dikhuatiri terjatuh dalam sungai Kanowit di Nanga Germai di sini, Ahad lalu