Sakura: Mulut Pulut Ati Keladi

RUAI PEMERINDANG

“Taja pan pia lagu tu nyelai laban iya ngenang dua iku indu ti enda manah ati enggau pangan diri. Ngena jaku ti muntang agi, kes
ke bansa tau disebut kitai ninding pangan diri.”

Pengidup siku-siku mensia sigi udah dulu diperambu Tuhan magang. Iya sigi udah bisi selatan tang semina kitai enda nemu gaya enggau lebas iya.

Baka siang enggau malam, baka nya mega pengidup kitai bisi maya tusah lalu bisi mega maya lantang.

Kenu ku orang, tusah senang nya sigi udah asam garam pengidup kitai.

Sakura Diana Dawi

Taja pia tusah enggau senang nya mih pemar ti mai kitai idup lebih badas laban nengah jalai ya kitai unlih bepikir lebih panjai tang ukai semina beserah aja baka orang ke nganti bulan labuh atas tapa.

Minggu tu berita pemerindang mai bala pemacha bekunsika berita enggau cherita ari siku artis ke baru udah bisi album kompilasyen.

Sakura Diana Dawi ukai tentu orang baru ba industri pemerindang laban tudah tuai terubah chakah ba aktiviti pemerindang dalam taun 2016 nyin suba.

Madahka penatai diri ari Lubok Antu, Sakura Diana diatu ngentapka pendiau diri di Kuching.

Naka tu Sakura Diana idup nyadi artis rikoding sereta enggau bisnes mit ke besangkut-paut enggau pekara pemajik ungkup orang indu.

BELI DIATU…Sakura (dua kiba) begulai enggau bakih penanyi dalam album kompilasyen Bujang Keling Sarawak rambau pejalai nemuai ngagai Opis Radia Catfm.

Album kompilasyen

Ba album kompilasyen Bujang Keling Sarawak ti dikeluarka Kaban Muzik Production (KMP) enggau MK  smokehouse, Sakura mai siti lagu iya nya Mulut Pulut Ati Keladi.

Mulut Pulut Ati Keladi nya siti lagu ti digaga Sakura empu (tiun enggau leka lagu) lalu muzik iya digaga Cami Tan ari Ranyai Sound Studio.

Artis kompilasyen bukai ba album Bujang Keling Sarawak nya Mecklyen (Ambai Aku), Bujang Keling Sarawak (Angela Ryann), Tubai Pengerindu (Isa Lee), Joget Sama Ngati Kediri (Ester Jeffery), Dara (Jeft Hardy), Sanggup Nganti (Roxanne Lee) enggau Tanda Tanya (Reaza Ray Ho).

Ditanya pasal pemanah album Bujang Keling Sarawak, Sakura Diana madahka album nya bisi lapan iku penanyi enggau lapan iti lagu ti bebida rentak enggau mod.

“Iya ti bendar lagu ba album kami tu bisi pemanah kediri empu. Lapan rentak bebida enggau lapan iku penanyi. Baka nya mega mod muzik iya, bisi slow rock, joget, balad, twist enggau ke bukai.

“Aku berani madah semua lagu ditu badas tauka engkeman ke semua orang ba semua tikas umur,” ku Sakura diatu semampai kisuk enggau bisnes iya Kumang Baik Embroidery & Beauty Services, siti kompeni mit ti udah direjister.

Diatu bisnes iya nya bepalan ba Batu Kawah (MJC) Kuching.

MERINDANG… Sakura benung merindang ba sebengkah palan pemerindang ditu.

Mulut Pulut Ati Keladi

“Mayuh orang nanya aku pasal lagu Mulut Pulut Ati Keladi. Lagu nya ti bendar ukai nyindir tauka dituju ngagai siku orang tang semina ngenang pengidup kitai mensia ti enda manah sereta enda rurus ati.

“Mayuh kitai manis ba mulut aja tang masam di dalam lalu ngembuan niat ti enda badas.

“Taja pan pia lagu tu nyelai laban iya ngenang dua iku indu ti enda manah ati enggau pangan diri. Ngena jaku ti muntang agi, kes ke bansa tau disebut kitai ninding pangan diri,” ku Sakura ke kala gawa ba ‘beauty line’ enggau Etude House, Sassa enggau Christina Image Beauty.

Bebekalka peneleba iya udah kala gawa di Singapore enggau Semenanjung Malaysia, Sakura diatu netapka pengidup diri di Kuching Sarawak.

Sekeda ari servis ti diadaka Kumang Baik Embroidery & Beauty Services nya eyebrows embroidery, eyeliner embroidery, lips embroidery, facial, waxing, Bbglow treatment enggau sekeda ke bukai.

“Ngagai kita ti bisi ati deka ngubah gamal enggau imej diri, kita tau madah tumu awakka aku ulih ngatur jam kita betemu enggau aku.

“Kita tau betanya ari aku ba lumur 016 -5117815,” ku Sakura nandu penerang iya pasal servis ti disediaka iya ba Kumang Baik Embroidery & Beauty Services.

Naka ke diatu, album Bujang Keling Sarawak udah bisi dijual ba pasar Batu 7 Kuching.

Kelimpah ari nya album tu mega udah tau dibeli ari Ester Jeffery
(Miri), Kenneth (Lubok Antu) enggau sida ke bukai di Kuching, Sri Aman.

Nambahka nya album tu mega udah diidar ke Johor enggau Kelantan di Semenanjung Malaysia.

Di Kuching album ti tau dibeli terus ari MK Smokehouse Kuching City Mall. Ba radio, lagu ari album tu mega udah berengkah dipasang ba Catsfm lalu ba Waifm diatu agi nganti pemendar ari raban pemerati lagu etnik RTM.

Industri Pemerindang eri komen pasal dunya pemerindang maya ke
diatu, Sakura madah industri muzik Iban makin mansang badas.

Nyau majak mayuh lagu enggau artis baru.

” Aku arap semua artis lama enggau artis baru ulih begulai sejalai enggau pangan diri. Anang rangka sereta anang kepapas au.

“Enti ulih beri sereta bantu mih artis baru laban sida tentu begunaka sukung enggau tulung artis lama.

“Ngagai komposer ti kreatif, gaga mih lagu ti lebih badas lalu anang takut nengkebang lagu bansa enggau sera baru.

“Kebuah pia laban nya mih siti ari chara kitai ngerembai sereta
berubah manah ari ke udah,” ku Sakura.

“Ngena peluang tu aku meri besai terima kasih ngagai Ranyai Sound Studio, Kaban Music Production, Catsfm, Waifm, raban pemberita, kaban facebook, premis prmerindang, MK Smokehouse sereta kita bukai ti enda ulih sebut aku ditu magang.

Terima kasih mega ngagai semua kita ti ulah meli album Bujang Keli Sarawak,”ku Sakura ngujungka randau.