Salcra enda patut dibalut enggau isu enda menuku

Maya penulis ada urung taun 1988 rumah panjai kami ba Titok ili, Lubok Antu din endang udah masuk Skim Kaunsil Pengempung enggau Pengintu Tanah Sarawak (Salcra) dipegai Opis Salcra, Merindun, Lubok Antu.

Diatu agi mega rumah panjai kami tu nyereta Skim Salcra tang dipegai opis ke baru iya nya Salcra Sedarat Memaloi.

Entara rumah panjai bukai ke kala nyereta Skim Salcra besemak enggau menua penulis iya nya Titok Ulu, San Semanju, Semanju Berenggang, Nibong, Bunu Beging enggau Gelong.

Menya peranak rumah panjai chukup regas nurun gawa ba kebun sawit Salcra. Nyangka ketegal nadai batang pengawa bukai tauka laban dividen ke diberi ngagai penyereta chukup besai.

Penulis agi ingat, urung taun 1998 asal sebut ke terima dividen peranak rumah panjai dah mupuk gaga laban penyampau terima dividen pemadu mimit RM8000 sepintu.

Dini enda tampak mua peranak rumah panjai, maya nya ukai nya bisi penatai pemisi bukai. Pengawa bumai padi semina dikereja ungkup diri empu ukai ungkup dijual.

Semina sawit Salcra endur mensia mayuh ngulihka penatai pemisi. Diatu ukai ketegal pemisi tang mayuh agi peranak rumah panjai milih gawa ke mengeri laban ngiga gaji ke lebih manah.

Tang diatu semua nya berubah, mayuh agi orang ke ngereja ladang sawit tu pengereja pengawa ari menua luar iya nya Indonesia.

Peranak rumah panjai nyau udah pandai sereta panjai runding numbuh sawit kediri empu lebih besai untung ari bekuli enggau Salcra.

Isu Salcra

Kekadang bisi didinga sebana peranak rumah panjai nesal nyereta Skim Salcra. Nama kebuah? Semua nya tentu bisi penanggul diasaika sida kelimpah enda lantang enggau asil dividen ke diberi Salcra ngagai sida diatu.

Salcra serikat besai ke chukup tebilang mayuh ngubah tikas pengidup komuniti Dayak lebih agi ba menua pesisir ari tikas penyeranta ngagai pengidup ke lebih menyana.

Taja pia, beberapa hari ke udah, kitai di Sarawak bela tekenyit ninga berita pengawa nangkap tiga iku pemesai senior opis Salcra beumur entara 52 ngagai 67 taun nyengkaum siku agi orang dagang ke bepangkat Datuk beumur 59 taun.

Amat munyiku jaku Kaban Kunsil Nengeri (Adun) Krian Ali Biju ti madah jasa tauka program pemansang digaga Salcra ungkup komuniti Dayak endang chukup besai lalu sigi enda patut program pemansang nya disalah guna ba sukut dikena beambi ulih (giga untung).

Beduduk ari nya, Ali ke mega Kaban Parlimen Saratok minta Chairman Salcra ke mega Sapit Kepala Menteri Datuk Amar Douglas Uggah Embas enda patut diau diri tang patut nerang penyadi isu ke ditapi kaunsil pemansang nya.

Kenu ku Ali, iya (Uggah) patut nerang isu tu sekalika kunterik bekaul enggau Salcra bisi digaga nengah chara tinda tebuka tauka aum terus?

Udah nya, sapa bagi serikat kunterikta besai ba Salcra enggau iya ke lebih beguna sapa ngempu saham pemadu besai dalam kaul direktor serikat nya.

Nengah penerang iya mega, Ali madah Salcra tu bisi kaul enggau projek ngemanah, logistik enggau kunterik injin besai ke beungkus beratus juta ringgit. Kati pengawa nangkap sida tu bisi kaul enggau pekara nya? ku tanya iya.

Ungkup penemu mega, Salcra ngelama tu endang nyendiaka mayuh kunterik besai nyengkaum nyendiaka baja, rachun ngagai selampur Sarawak ungkup kandang menua ke bisi enggau betanam sawit nengah Salcra.

Naka tu, urung 20, 000 peranak Sarawak bisi ngambi bagi ba Salcra lalu sida menggi tanah urung 50, 000 hektar pemesai ke alai Salcra nanam sawit tentu deka nemu penanggul, penekul ditapi serikat tu.

Entara kandang menua ke bisi endur Salcra nanam sawit iya nya Lubok Antu, Sri Aman, Betong, Saratok, Serian, Bau enggau Lundu. Enggau jaku puntang menua ke dibungkur endur nanam sawit Salcra tu berenbgkah ari Lundu nyentuk ke Kabong.

Sehari udah nya, lebuh ditanya raban pemberita ba Begunan Wisma Bapa Malaysia di Kuching bekaul enggau penyadi isu tu, Uggah ngelempai penuh kes tu ngagai SPRM bejalaika pansik. Kenu ku iya, ngarapka SPRM ulih bejalaika pansik enggau profesional sereta nitih atur ke ditetap.

Naka tu iya bedau ulih meri sebarang timbal bekaul enggau kes nya tang nejuka nya dipansik dulu. Taja pia, iya madah sebarang pemutus pansik patut diterima semua piak enggau tebuka.

Penumbuh Salcra

Salcra ditumbuh kena Mei, 1976 nyadi sebengkah sebagai Badan Berkanun Kerajaan di bawah Ordinan Pihak Berkuasa Penyatuan dan Pemulihan Tanah Sarawak, 1976.

Diatu, Salcra ngatur semilan 19 bengkah Ladang Besai Kelapa Sawit ungkup penyereta lalu bisi lima buah kilang. Digaga swasta lalu numbuhka anak serikat, Salcra Jaya Sdn Bhd dikena nyaup gerup enggau pengawa dagang ke bisi kaul enggau betanam betupi sereta logistik.

Kelimpah nya numbuhka Sarawak Fertilizer Sdn. Bhd. (SFSB) dikena ngasil enggau nyendiaka baja ungkup ladang Salcra. Pengawa Pansik enggau Pemansang (R&D) ke ditumbuh ungkup pengawa nanam kayu (Pansik Buluh enggau Kayu Garu).

Mungkal Projek Nupi Ikan di Batang Ai Lubok Antu lalu dipadu Perintah Nengeri nyadi Ejensi Pengereja Pengawa dibaruh Bidang Ekonomi Besai Menua (NKEA) EPP4-Akuakultur.

Pia mega, Salcra bisi numbuhka Taman Nuseri Sawit ba Palan Betanam Betupi, Karabungan, Miri sereta numbuhka Palan Latih di Bajo, Lundu.

Perintah Nengri endang seruran ngemeratka pemansang kandang mengeri enggau menua pesisir ngambika sebela ke pemaik semua rayat. Nyadi beduduk ari nya, program-program pemansang ke digaga nengah Salcra endang betuju dikena ngemujurka juluk nya.

Nya alai, kitai ngarapka Salcra beresi ari sebarang isu ke ulih ngeruga serikat enggau pemaik bala penyereta ke seruran ngarapka nerima dividen ke lebih manah ari ngelama tu. 

alvester bigol columnist

Suara Sarawak