SALOMON Gau, siku penebah muzik enggau pedagang kraf asal ari Long Ikang, Baram.
Ukai semina nya aja, Salomon mega ngembuan peneleba lebih 20 taun nyagu seni kraf.
Iya ke mega pengajar semampai nambah anak penemu diri taja ngembuan mayuh pengelandik.
Salomon mega landik nebah Sape, nyadaka lagu lama Kenyah, mandangka tanda asal lalu diatu nengkebang sereta nebah Jatung Utang.
Nambah nya, iya mega nyagu tanda asal Kenyah lalu udah mandangka tanda asal nya enggau Hongkong Chinese Orchestra ba taun 2018.
Bekunsika penerang ba ruai Facebook Borneo Laboratory, Salomon mega udah nyadi tim kreatif ungkup Kelunan ba taun 2019 ke mega teater muzik ti ngangkat ke turai sejarah raban bansa Kayan-Kenyah dikemujur The Tuyang Initiative.
Iya mega chukup landik ngajar laban udah belajarka pengelandik nya kenyau beumur lima taun.
Ngenang pasal pejalai pengidup diri, Salomon madah ba taun 2001, iya berengkah nengkebanng kereban muzik Sape pengudah muzik Sape tebilang.
Ari nya, iya belajar pengelandik nya ari dua iku veteran enggau penengkebang Sape sereta mega Jatong Utang, iya nya Lian Seling enggau Michael Arang Jalong.
Entara penyulut dijapai Salomon baka champion ba Borneo Sape Festival begulai enggau guro iya, Michael Arang Jalong dalam taun 2008.
Iya mega udah ngatur pejalai merindang ba tiga menua baka Switzerland, France enggau Norway begulai enggau Jerry Kamit ba taun 2013.
Ba taun 2014, iya udah bejalai merindang ba Germany begulai enggau Mathew Ngau Jau ke mega digelar Malaysia’s Living National Heritage.
