LAWAS: Pengawa masang Sarawak Linking Urban, Rural and Nation (Saluran MYSRBN) deka mantu peranak di menua pesisir kelebih agi raban nembiak sekula enggau orang dagang.

Kepala Menteri Datuk Patinggi Abang Johari Tun Openg madahka taja ungkus masang tiang pemanchar di menua pesisir mar tang iya madahka pekara nya nadai ngawa laban tuju perintah sigi endang deka mantu rayat.

“Enti orang di mengeri aja bisi internet, tang orang di menua pesisir nadai ulih, nya nadai adil.

“Taja pan mar, nadai ngawa perintah Gempung Parti Sarawak (GPS) nanggung awakka menua pesisir bulih internet,” ku iya.

Abang Johari bejaku munyi nya rambau Bejadika Sarawak Linking Urban, Rural and Nation (Saluran MYSRBN) di Masegit Baru Trusan, Lawas ditu, tadi.

Ku iya, MYSRBN ngemuntangka kaul entara orang ti ngena enggau sambung internet wifi ti deras.

“Tadi aku nguji nganjung video ngagai sida di Kuching, aku nanya terang ke enda? Sida din nyaut terang.

“Nya reti iya, dunya udah ulih meda kitai.

“Nyin suba, kitai bisi tiang pemanchar baka kali endur tiang pemanchar tu nganjung signal ngagai tiang pemanchar ti bukai, tu ari serikat telekomunikasyen baka Telekom, Maxis enggau ke bukai,” ku iya.

Taja pia, ku Abang Johari serikat telekomunikasyen tu enggai nyambung agi laban peranak menua pesisir nadai mayuh sereta ngujungka sida rugi.

“Bekau ari nya, kitai mantu sida di menua ngambika bisi arus penyambung ti manah nyengkaum nembiak sekula.

“Maya Covid-19 mayuh anak kitai nadai besekula tegal nadai internet.

“Nengah internet kitai ulih bekaul enggau orang bukai, mayar barang pan ulih ngena telefon aja,” ku iya.

Dulu ari nya, Sapit Kepala Menteri Datuk Amar Awang Tengah Ali Hasan madahka guna digital ti dipansutka Abang Johari amat beguna kelebih agi lebuh pengerekai Covid-19.

“Iya udah nyedarka kitai sentang guna IT enggau ekonomi digital, tu meh tuai ti ngembuan juluk ati ke mua.

“Lebuh pengerekai Covid-19 ti udah mangai dua taun, pekara digital dipeda amat beguna.

“Maya kitai bejalaika Atur Mindah Betagang (PKP), kedai mayuh ditutup, orang nadai bedaja enggau anak kitai nadai besekula,” ku iya.

Iya nandu, rayat di menua pesisir ti deka ngaga peminta bantu ngagai perintah mega mayuh tinggal laban enda ulih niki ngagai opis perintah lebuh pengerekai Covid-19.

Ku iya, semua penanggul tu deka ulih diputarka nyema palan nya kelebih agi di palan menua pesisir bisi internet.