BINTULU: Bintulu terus berubah ba bemacham sukut belabuh ari taun 1979 kelebih agi ba sektor industri.

Ku Sapit Menteri Infrastruktur enggau Pemansang Penyangkal Kapal Sarawak, Datuk Majang Renggi, sitak Samalaju kelebih agi diatu nyadi siti palan industri pemadu besai ba wilayah tengah Sarawak.

“Semua tu endang berindik ari pemintar Perintah Gempung Parti Sarawak (GPS) ti chakah ngemansang sektor industri ba nengeri tu kelebih agi ba sitak Samalaju ti endang nyadi pun industri besai Sarawak,” ku iya.

Majang mansutka jaku nya lebuh bejadi Projek Parit enggau Bekal Ai Beresi Rumah Sibat ba Batu 29, Jalai Bintulu-Miri, ditu kemari.