Samarahan deka nyadi mengeri baru 2050

KOTA SAMARAHAN: Mengeri Samarahan deka ditempa nyadi sebengkah ari mengeri baru baka Kuching enggau Miri ba taun 2050

Chairman Kaunsil Mengeri Kota Samarahan (MPKS), Datuk Peter Minos madah Samarahan siti menua ti benung angkat pemansang.

“Naka diatu lebih 200,000 iku mensia nguan menua Samarahan dalam timpuh 10 taun aja, udah nya bisi 42,000 ruang bilik ba menua tu.

“Nya alai, rayat ti diau ba menua tu patut nyaga menua tu enggau manah laban enggau nya, kitai enda ibuh nganti taun 2050 baru nyadi siti mengeri ti baru,” ku iya lebuh dirandau Suara Sarawak ba opis iya di Kaunsil Mengeri Kota Samarahan, kemari.

Minos madah diatu sida benung nyendiaka diri ngagai maya nya, baka deka bisi sepital baru, nyaga pemeresi rampa menua, palan lumba enggau main kediri sereta bisi hotel lima bintang, nya perambu ti benung diperundingka kami.

Kredit photo: Dayakdaily

“Kami mega benung gawa bebendar nempa Samarahan nyadi sebengkah menua ti likun alai diau.

“Enti sema utai tu bisi, ba taun 2030 Kota Samarahan ulih nyadi mengeri baka Kuching,” ku iya nambah.

Taja pia, diatu ku Minos, semina 10 peratus aja ari Samarahan tu mansang maju laban nya semina ba Kota Samarahan aja, ukai nyengkaum selampur dipegai bagi Samarahan.

“Menua pelilih mit baka ba Asajaya, Sadong Jaya, Simunjan agi bisi endur ti bedau mansang.

“Menua sida tu mayuh asil betanam, lalu perintah patut mantu sida ba menua tu ngambika sida tu ulih mansang nengah pemansang dikumbai betanam nengah chara moden,” ku Minos madah.

Minos madah perintah patut adil dalam ngemansangka menua tu, ukai semina ba Kota Samarahan aja, tang selampur pegai bagi Samarahan.