Samarahan dikategori zon gadung sehari tu

KUCHING: Samarahan betukar nyadi zon gadung ari zon kuning pengudah 14 hari nadai ngerikod kes positf baru Covid-19.

Sapit Kepala Menteri ti mega nyadi chairman Komiti Penyangga Penusah Ngenyit Nengeri Sarawak (JPBNS) Datuk Amar Douglas Uggah Embas madahka pekara nya lalu ngujungka 35 zon ba udah dikategori zon gadung.

“Lima zon bukai nyengkaum Kuching, Lundu, Tebedu, Sibu enggau Serian agi ba zon kuning lalu Sarawak nadai zon mirah naka sehari tu,” ku iya.

Uggah madah munyi nya ba aum pemberita di Begunan Dun Lama ditu tadi.

Ku iya, taja Sarawak udah bejurut tujuh hari nadai ngerikod kes baru positif Covid-19 tang genap iku rayat meseti seruran bejaga.

Berebak enggau nya, Uggah madahka dua kes positif udah ditemu suman lalu dikemendar pansut ari sepital.

“Dua kes nya ari Sepital Besai Sarawak (SGH) enggau Sepital Sibu.

“Nya ngujungka bisi 439 tauka 80.70 kes positif peratus ba nengeri tu udah suman,” ku iya.

Uggah mega madahka bisi 41 kes Pesakit Agi Dipatau (PUI) lalu 32 kes agi nganti pemutus ari makmal.

Suara Sarawak