BETONG: Gelar Kumang Gawai seruran diperebut bala indu dara ke bebajik maya nyambut pengerami Gawai Dayak ninting taun.
Endang ari kelia menua Betong nadai kala ngelaungka pengawa ngatur pekit ti ngangkatka gaya idup bansa Dayak kelebih agi bansa Iban.
Taun tu, 11 Mei nyadi hari pemadu dianti semua kitai, gagit deka nemu sapa bagi indu bajik menggi Gelar Kumang Gawai Bagi Menua Betong 2019 beserimbai enggau Karnival Gawai Dayak Renggat Bagi Betong.
Nitih ku penerang Chairman Komiti Mit Pekit Kumang Gawai Sigat Sang, taun tu sida bisi nerima lapan iku penyereta datai ari mayuh bengkah menua, nganjung diri bepekit.
“Sida ti dipilih bepekit renggat kepenudi ngerebut gelar Kumang Gawai iya nya Maria Madelina Sujie, 23 (Kuching), Catherine Annda Thomas, 21 (Saratok), Ullia Ulanda Rumpang, 20 (Kuching), Marvis Rirak Mandau, 27 (Betong), Helena Vanissa Humphrey, 21 (Betong), Elizebeth Lydiana Bujang, 19 (Sibu), Caroline Yak Eka, 21 (Betong) enggau Mary Queen Ambrose Karim, 25 (Betong).
“Aku mega pechaya, mayuh kitai diatu meragam sapa bagi indu dara ti benasit, ti deka diakim ari ngembuan pengelandik enggau penau, regas batang tubuh sereta pemintar runding, lanchat mansutka penemu ti ukai semina ngira pemajik gamal aja.
“Kitai mega ngarapka semua pemekit dalam timpuh kurang seminggu tu deka nyikap diri ari semua sukut pekara, ukai semina ngantaka pemajik enggau ngepan aja tang mega pekara bukai ti udah ditetapka akim profesional,” ku iya lebuh ditanya Suara Sarawak ditu, kemari.
Pia mega ku Sigat, maya pekit kepenudi diatur nyerumba Pengerami Makai Lemai Gawai Dayak Renggat Bagi Menua Betong 2019, sida bisi nyendiaka perais chukup manah.
“Champion tauka pemenggi gelar Kumang Gawai deka pulai ngemai perais mata duit penyampau RM2,200 disempulang trofi, bungai, hamper, tepa enggau setipikit.
“Seraya lumur dua tauka Lulong Gawai nerima RM1,700 disempulang trofi, bungai, hamper, tepa enggau setipikit.
“Gelar Selinggar Matahari Gawai tauka penuduk ketiga mega deka nerima RM1,200 disempulang trofi, bungai, hamper, tepa enggau setipikit.
“Pemekit bukai mega enda pulai enggau jari puang. Sida deka nerima perais sagu ati 700 enggau trofi, bungai, hamper, tepa sereta setipikit,” ku iya.
Kelimpah ari nya ku iya, Anugerah Ngepan Pemadu Manah mega diperebut ti nyendiaka perais mata duit penyampau RM500.
Taun tu mega SMK Datuk Patinggi Kedit sekali agi dilempaika pengandal ngatur pekit nya ti diketuaika pengajar Sigat Sang.
Nikalka kenang pekit kenyau ari beberapa taun ke udah, gelar Kumang Gawai Bagi Menua Betong kala dipenggi Frevirra Pearl Francis (2014), Steffi Debra Robinson (2015), Gracezilla Amanda Benjamin (2016), Lucynthia Liben (2017) enggau Sophia Benet @ Denot (2018).
