Sapit Direktor JBPM Sarawak ngabas taba Balai Bomba Kabong

KABONG:  Juluk peranak Kabong deka bisi sebuah Balai Bomba dipelaba deka nyadi nyata enda lama agi.

Pekara tu dikenukuka Sapit Direktor JBPM Sarawak PPgB Jainal @ Zainal Bin Madasin lemai kemari rambau penemuai iya ke Kabong seraya ngabas taba ti engkeman alai nirika Balai Bomba baru nya.

Dulu ari tu, Adun Kabong,Mohd.Chee Kadir bisi mantaika peminta rayat ditu bekaul pematut ngaga Balai Bomba dikena naagang penusah angus baka ti udah nuntung Kampung Hilir,Sungai Pala apin lama ke udah.

Pekara tu mega udah dikenataika Chee Kadir rambau Aum Dun minggu nyin kemari.

Berebak enggau nya, siku peranak Kampung Wawasan,Taim Amat,62 taun arap amat juluk nya udah ulih nyadi nyata beduduk ari penemuai Sapit Direktor JBPM.

“Aku arapka sebuah Balai Bomba ditu ulih digaga enggau lengkas asil ari penemuai Sapit Direktor JBPM Nengeri Sarawak kitu.

“Kami ditu endang udah lama ngining deka bisi sebuah Balai Bomba ungkup pengelikun rayat mayuh,” ku iya.

Sama datai rambau penemuai nya Ketuai Zon 3,PgB Ramlan Bin Marajan,Ketuai Pampang BKK Zon 3,TPgB Di Hatta Bin Gobel enggau Ketuai Balai Bomba Saratok,PPgB Nazry Bin Mohamat.