KUCHING: Sebuah jematan lambung ba Simpang Saratok dikena mutarka penanggul jalai alun sekut ba sitak nya patut digaga.
ADUN Krian, Friday Belik madah, enti Jalai Besai Pan Borneo tembu ila, rayat deka bulih pemaik enggau muntang agi mindah kin kia ari sukut penyauh enggau awak tang penyampau entukar betengah ke jalai nya deka nambah.
“Tu deka ngasuh penanggul jalai raya sekut nyadi, nya alai kami beguna ke sebuah jematan lambung ba Simpang Saratok dikena mutar penanggul tu ti nyadi ninting hari kelebih agi maya musin pengerami baka Taun Baru China, Hari Gawai, Hari Raya enggau Krismas.
“Penanggul jalai raya sekut tu ukai semina meri penanggul ngagai penguna tang ulih ngeruga pengelikun penguna jalai alun.
Friday mansutka jaku nya lebuh bejuraika mosyen terima kasih ngagai Jaku Tuai Pemegai Menua (TYT) Nengeri Sarawak ba Aum Keterubah Penggal Kedua Kunsil Nengeri (DUN) Sarawak, ditu tadi.
Ku iya, Simpang Saratok entara simpang jalai besai ti nadai ngembuan jematan lambung ba sepemanjai Jalai Besai Pan Borneo.
Nya alai ku iya, pekara nya ngasuh sekeda rayat ba sitak Saratok enda tepantup ati.
