Sarawak andal ngetanka champion Para Sukma

KUCHING: Karnival Orang Nyelai Pendiau Sarawak (Kokus) diperambu dikena nyikap atlit nyelai pendiau (OKU) menua tu nyereta Lumba Malaysia (Sukma) ti deka diatur ba Johor Baharu taun baru.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka iya andal Sarawak agi ulih ngetanka penuduk champion kali ke-14 ba lumba Para Sukma.

“Kitai udah mujur nyadi champion 13 kali nejurut, lalu aku andalka menua kitai deka bulih champion kali ke-14 taun siti tu ila ba Sukma Johor.

“Nya alai Kokus diatur ngambika bala atlit menua tu terus meruan bepekit sereta majak chakah ngulihka champion,” ku iya.

Fatimah bejaku munyi nya lebuh aum pemberita Kokus ba Begunan Baitul Makmur ditu, kemari.

Ku Fatimah, ngelansa karnival ti deka diatur ba Unimas kena 23 nyentuk 27 November tu ila bisi 11 iti lumba deka dipejalai.

“Semua 11 iti lumba tu iya nya nyemerai, lumba, angkat berat, boling, badminton, ping pong, boccia, bocce, chatur, ‘lawn bowl’ enggau nimbakka laja.

“Kelimpah nya, bisi dua iti agi penau ti deka diatur maya karnival tu ila nya nya ba penau enggau peneleba,” ku iya.

Iya madahka, ba pekit penau dia bala OKU deka bepekit ba pengawa nero, ngubah bungai, nyumai, ngaga kek, nyait, nyulam, fotografi, ngukir kayu enggau proses data.

“Lalu ba pekit peneleba bisi tiga iti kategori deka dipekitka iya nya belagu solo, nebah muzik solo sereta betanda solo enggau beraban.

“Aku arapka, karnival tu ila deka meri awak ngagai bala OKU selampur Sarawak sama bela ngambi bagi sereta terus ngemeranka pengidup ti bepengerai enggau regas,” ku iya.

Sama bisi datai Presiden Pesron Sarawak Metthew Chin Hiong Choi, Pengajar Paralimpik Mustapa Khan enggau bala bukai.