Sarawak begunaka chara semitan nyidi Covid-19

KUCHING: Perintah Sarawak patut ngiga chara pemadu semitan tauka inovatif ngambi ulih nyidi enggau ngerintaska rantai Covid-19 enggau jampat.
Felo Akademi Sains Malaysia, Datuk Dr Madeline Berma ngarapka perintah menua tu ulih mantaika pekara nya nyadi sebagi ari pengawa mukaska pandemik nya.
Ku iya, kitai ulih numbuhka palan pansik ‘drive-in’ ke nyadi palan sekali ngetu (one-stop centre).
“Ba palan tu, kitai ulih bejalaika pansik, nyidi enggau ngempul chunto lendir liur enggau jampat.
“Udah nya perintah tau berunding ngelangkar strategi nyaga, ngetan enggau nyendiaka ekonomi rayat ke tegap di menua tu,” ku iya madah ngagai Suara Sarawak ditu tadi.
Dr Madeline madah, chara Bantu Khas Sarawakku Sayang (BKSS) dibantaika Kepala Menteri Datuk Patinggi Abang Johari Tun Openg tadi agi fokus ngagai pengelantang rayat.
“Udah umbas endur Sarawak mantaika strategi dikena ngetanka penegap ekonomi ngena chara nambahka agi guna isi rumah enggau eksport.
“BKSS 5.0 tu dikearap ulih bejalaika strategi ti semitan agi mutarka penusah rayat lebih agi lebuh napi ekonomi pasca-Covid,” terang Dr Madeline ke mega Pemikir Ekonomi.

Suara Sarawak