Sarawak bisi pengelebih nyadi pengeluar pemakai 2030

“Diatu kitai agi ngimport pemakai ari luar. Mayuh makit pemakai lalu Sarawak enda ibuh meli produk pemakai ari luar enti kitai bebendar mansutka asil pemakai kediri empu.”

KUCHING: Sarawak bisi pengelebih nyadi pengeluar pemakai manggai taun 2030 laban bisi tanah ke besai enggau gaya hari ke manah.

Kepala Menteri Datuk Patinggi Abang Johari Tun Openg madah, diatu Sarawak ngimport urung RM4.7 bilion produk pemakai kelimpah eksport semina RM900 juta.

Berebak enggau nya ku iya, Sarawak meseti beratka pekara nentuka pemakai kitai bisi kualiti ngambi ulih nyadi pemansut besai ba produk pemakai.

“Dalam taun 2030, kitai deka nyadi pemansut pemakai ngagai dunya nyengkaum menua sepiak.

“Diatu kitai agi ngimport pemakai ari luar. Mayuh makit pemakai lalu Sarawak enda ibuh meli produk pemakai ari luar enti kitai bebendar mansutka asil pemakai kediri empu,” ku Abang Johari.

Iya mansutka jaku nya lebuh bejadika Sarawak Agrofest 2019 di Celebration Square ditu, kemari.

Abang Johari madah, asil betanam betupi ngagai Asil Dalam Menua (KDNK) disadang nambah 2.4 peratus dibanding 12.4 peratus taun nyin kemari.

“Penyampau tu mai reti sektor betanam betupi ba Sarawak terus mansang lebuh nambah urung 15 peratus taun tu,” ku iya.

Abang Johari mega madahka Perintah Sarawak deka terus beratka sektor betanm betupi ke nyadi pemun pemansang ba menua tu.

“Dalam Bajet Nengeri Sarawak 2020 apin lama, kitai ngagihka belanja RM797 juta dikena bejalaika polisi betanam betupi,” terang iya silik agi.

Nambahka nya, Abang Johari madahka Perintah Besai mega minta Sarawak ngenegapka agi sektor betanam betupi.

“Kitai diberi kuasa ngeluarka lisin nangkap ikan lalu Menteri Besai (Tun Dr Mahathir Mohamed) dekaka kitai ngeluarka pemakai jelu.

“Kitai deka ngemansangka sektor nya tang Perintah Besai mega patut meri agih belanja ngagai kitai,” terang iya silik agi.

Sama datai Sapit Kepala Menteri Datuk Amar Douglas Uggah Embas, Datuk Amar Awang Tengah Ali Hasan enggau Menteri Dagang Temuai, Seni enggau Main Asal Datuk Abdul Karim Rahman Hamzah.

Suara Sarawak