BANGI: Dr Hazland Abg Hipni mujur dikangau nyadi pengelicha Randau Antarabansa Angin Beresi Malaysia Keterubah 2023 (Macif 1.0) ti diatur ba Palan Aum Bangi (BACC).

Sapit Menteri Kuasa enggau Pemeruan Rampa Menua (MEESty) Sarawak nya diberi basa nyadi siku panel ba randau bepelasar Industri Meruan – Strategi Mitigasyen Nuju Langit Biru.

Sebengkah penerang ari Opis MEESty tadi madah, maya bejaku nya, Dr Hazland bejurai senentang inisiatif Perintah Sarawak nuju industri meruan sereta mutar isu, penanggul enggau strategi mitigasyen.

“Dr Hazland bela bejurai pangku pengawa polisi enggau atur perintah ba pengawa ngelaku industri meruan sereta chara tuai industri bekerejasama enggau penengkebang polisi dikena nempa ubah.

“Pia mega, iya bela mantaika insentif ti dipejalaika perintah dikena meransang industri ngambi ngemeran pengawa industri meruan enggau pengulih betukar pengerembai ekonomi dibanding pekara meruan,” ku penerang nya.

Iya mega bejurai senentang chara perintah bekerejasama enggau industri dikena nempa pelin tunga kuing dudi hari ti meruan agi.

Penerang nya mega madah, randau nya diatur dikena nyendia pelasar ngagai rentayan, aum enggau pengawa bekunsi penemu senentang isu bekaul pemeresi angin.

“Randau tu diatur MyCAS, gerempung ukai perintah (NGO) ti rejister ba baruh Opis Pengerejister Gerempung Malaysia (JPPM).

“Juluk besai penumbuh MyCAS dikena mutar isu bekaul tikas kualiti angin ba renggat dunya enggau nasional.

“MyCAS mujur ngatur Aum Kualiti Angin ti Manah Agi (BAQ) ti dipasuk 700 penyereta ari 50 menua ba serata dunya.

“Pia mega, Aum Aerosol Asia Ke-13 2023 deka diatur ba Kuching ba bulan Ogos 2023,” ku penerang nya.