Sarawak chukup begunaka tim Bombardier, Medivac

KUCHING: Malaysia dalam perambu ngembuan tim Bombardier enggau bilun engkabang ambulan dikumbai Medivac kediri.

Menteri Pengawa Berumah enggau Kaunsil Kandang Menua Zuraida Kamaruddin madahka Bombardier di Malaysia patut bisi laban menua baka Sarawak ti suah kena angus begunaka perengkaguna nya.

“Bombardier sebengkah chara ke alai kitai madamka api ngena ai ari bilun terebai, nya ti benung diperambu kitai.

“Seraya ambulan bilun engkabang tauka Medivac siti chara dikena kitai nyelamatka sida ti dituntung penusah angus nengah servis ari langit,” ku iya.

Zuraida bejaku munyi nya lebuh ditanya pemberita pengudah Pengerami nyuaka Perengka Pemadam Api di JBPM Tabuan Jaya ditu, kemari.

NERANG…Zuraida Kamaruddin (dua kiba) nerang ngagai pemberita pasal tim Bombardier enggau Medivac.

Ku iya, kelimpah ari mansik pasal perengka pemadam api, bala tuai rumah diajar sereta disikap ngambika ngadang maya dituntung penusah angus.

“Kitai andalka bala ketuai genturung pendiau nemu chara nyeliah penusah angus ba renggat tumu.

“Nya alai sida tuai rumah dipilih ngulu latih ngerara api, licha enggau aktiviti bukai ti dipejalai sida bomba,” ku iya.

Ba pekara bukai iya madahka pelin ngatur pendiau rumah panjai baru di menua tu agi patut dipansik.

“Mayuh pekara deka dipansik sentang gaya pengidup sida di rumah panjai laban kitai enggaika sida napi penanggul empas ari pengawa nya.

“Pia mega kitai meratika dulu gaya agih belanja ti diberi perintah sebedau ngatur nama-nama pengawa laban ngira mekal ai enggau karan sida di rumah panjai,” ku iya.

Suara Sarawak