KUCHING: Pengawa milih leka jaku Iban ‘Segulai Sejalai’ nyadi rambai jaku penyerakup menua nya beguna amat dikena ngaku Sarawak sereta penyerakup ba nengeri tu.
Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan madah, leka jaku nya engkeman ba pengawa mai agenda penyerakup menua laban Sarawak nyadi kelai penyerakup komuniti ti diuan bemacham pupu bansa.
“Pengawa milih rambai jaku tu nunjukka Menteri Besai, Datuk Seri Anwar Ibrahim ngaku Sarawak nyadi chunto penyerakup ngagai nengeri bukai ba Malaysia lalu penyerakup tu udah ditempa kitai ari jeman 1970-an suba.
“Nya kebuah kitai ulih duduk semija lalu rambai jaku tu dikena nyadi rambai jaku nasional.
“Kitai meseti ngetanka penyerakup ti mandangka etnik kitai ulih begulai manah sereta bekerejasama enggau pangan.
“Pekara tu endang pemutus manah ti digaga Menteri Besai,” ku iya.
Empai lama, Anwar bisi madah leka jaku Iban ‘Segulai Sejalai’ deka nyadi rambai jaku penyerakup ba selampur menua.
Iya madahka diri tekait ati enggau leka jaku nya ti nyadi rambai jaku ba Pengerami Gawai Dayak Renggat Nasional ti digulu iya ditu, empai lama.
“Nya alai, ba sebarang endur ti dilawa aku, lebuh bejaku senentang pekara begempung, penyerakup, bekerejasama enggau penegap, aku deka seruran nyebut ‘Segulai Sejalai’,” ku iya rambau pengerami nya.
