Sarawak diatu zon gadung

KUCHING: Sarawak diatu status gadung pengudah Pelilih Kuching enggau Serian nadai ngerikod kes baru Covid-19 ba timpuh 14 hari.

Komiti Penyangga Penusah Ngenyit Nengeri (JPBN) madah, reti iya semua pelilih ba Sarawak diatu status gadung.

“Berebak enggau nya, JPBN ngemendar semua sektor ekonomi ba Zon 1 mungkur Bagi Menua Kuching, Samarahan enggau Serian deka dibuka baka selama bepun 15 Ogos tu.

“Pemutus nya digaga pengudah beratika kes Covid-19 ba Sarawak.

“Pemutus nya digaga pengudah berandau sereta minta sanding penemu ari sukut pengerai enggau ekonomi begulai enggau Opis Menteri Pengerai Malaysia (KKM) enggau industri dagang temuai,” ku penerang nya.

Ngelansa pasal kes Covid-19 ba Sarawak, nadai kes baru positif Covid-19 dirikod ngujungka kes positif menua tu mengkang 681 kes naka sehari tu.

Suara Sarawak