KUCHING: Sarawak udah dipilih nyadi tuai rumah program Kongres enggau Mandang Ai Sedunya Gerempung Ai Antarabansa (IWA) ba taun 2028.
Premier Sarawak, Datuk Patinggi Tan Sri Abang Johari Tun Openg madah, pengawa milih mengeri Kuching nyadi palan ngatur program tu nurai sejarah baru enggau besai ukai semina ungkup Sarawak aja tang mega ungkup Malaysia sereta selampur rantau Gerempung Menua Asia Tenggara (ASEAN).
“Serimbai Hari Malaysia, aku enggau gaga madah ngagai semua kitai, Sarawak dipilih nyadi tuai rumah ngatur program Kongres enggau Pemandang Ai Sedunya IWA ba taun 2028.
“Udah tentu tu nyadi siti agi kelai ti manah kelebih agi lebuh ngintu Hari Halaysia ti ulih dikemegah semua rayat di menua tu,” ku iya.
Abang Johari bejaku munyi nya rambau Hari Malaysia 2023 Renggat Nasional di Stadium Perpaduan Kuching, ditu malam tadi.
Ku iya, kongres nya deka diatur ba Palan Aum Borneo Kuching (BCCK) ti baru seraya dipelaba narit urung 10,000 penyereta ari 80 buah menua.
